Боловсролын үнэлгээний төвийн дарга Э.Цэрэнцоодол, Боловсролын яамны Ерөнхий боловсролын бодлого зохицуулалтын газрын дарга Л.Ганбат нар энэ оны анги дэвших болон төгсөх шалгалтын үр дүн, элсэлтийн ерөнхий шалгалтын талаар мэдээлэл өглөө. Энэ үеэр Л.Ганбат “2026 оны хичээлийн жил дуусаж, улсын шалгалтууд эхэлж байна. 2018 онд боловсролын сайдын баталсан А425 тоот тушаал буюу суралцагчийн болон боловсролын чанарын үнэлгээний журмын дагуу боловсролын яамнаас улсын бүх сургуулиудад нэгдсэн журам өгч сургууль тус бүр шалгалтын материалаа өөрсдөө бэлтгэдэг учир цахим орчинд тараагдсан шалгалтын материал задарсан гэх мэдээ нь ташаа мэдээлэл юм.

      Багш нарын гүйцэтгэлийн үнэлгээ шалгах үйл ажиллагааг тав дахь жилдээ зохион байгуулж байна. Үүнд хэн илүү сайн ажиллаж, хэн өндөр үнэлгээ гаргаж чадсан нь үндсэн цалин дээрээ нэмэлт шагнал урамшуулал авдаг. Боловсролын чанарын үнэлгээнд улсын хэмжээнд 711 сургууль, 30106 багш, 870457 суралцагч хамрагдсан. Багш нарыг Боловсролын үнэлгээний төвөөс дөрвөн шалгуур 12 үзүүлэлтээр дүгнэдэг. 11 үзүүлэлтийг нь тухайн сургууль дүгнэж, үлдсэн нэгийг нь үнэлгээний төвөөс дүгнэдэг” гэв.

    Харин Э.Цэрэнцоодол “Энэ жилийн элсэлтийн ерөнхий шалгалтад 49014 шалгуулагч бүртгэгдсэн. Шалгалт дууссаны дараа 24 цагийн дотор Их, дээд сургуулиудад дүнгийн мэдээлэл очно. Шалгуулагчид бүртгэлийн хуудас, суудлын хувиар, иргэний үнэмлэх, бүрэн дунд боловсролын баримт бичигтэй ирснээр шалгалтад орох боломжтой. Элсэлтийн ерөнхий шалгалттай холбогдуулан Тагнуулын Ерөнхий газартай хамтран шалгалтын материалыг аймаг, дүүргүүдэд хүргэж байгаа. Мөн Нийтийн хэв журмыг сахиулах цагдаагийн газартай хамтран шалгалт үргэлжилж байх үеийн аюулгүй байдлыг хангаж ажиллаж байна. 2028 онд элсэлтийн ерөнхий шалгалтыг олон улсын үнэлгээнд зөвшөөрөгдсөн SAT-ын хэлбэрт шилжүүлнэ. Харин тусгай хэрэгцээт хүүхдүүдэд тусад нь анги танхим бэлдэж, элсэлтийн ерөнхий шалгалт өгөхөд шаардлагатай хэрэгцээ, тав тухаар хангана” хэмээлээ.

Энэ жилийн ЭЕШ-ын хуваарьтай танилц

• 6.25-нд түүх, англи хэл
• 6.26-нд хими, газарзүй, нийгэм судлал
• 6.27-нд биологи, математик
• 6.28-нд физик, орос хэл, монгол хэл

Б.МӨНХДЭЛГЭР