Хичээлдээ явахдаа найзынхаа гэр бүлийн таван хүний амь аварсан З.Эмүжин охиныг Монгол Улсын Ерөнхийлөгч “Шударга журам” медалиар шагнасан билээ. Түүнтэй баатарлаг үйлсийнх нь талаар болон баярынх нь сэтгэгдлийг хуваалцлаа.

-Олон хүний амь аварч, “Шударга журам” медалиар шагнуулсанд нь баяр хүргэе. Монгол Улсын Ерөнхийлөгчөөс шагнал гардан авах мөч ямар байсан бэ?

       -Төрийн ордонд Ерөнхийлөгчөөс шагнал гардан авахад догдлол дүүрэн мөртлөө маш их сандарч байсан. Хэд хоногийн дараа тэр мөчөө эргээд бодоход үнэхээр сайхан байсныгаа улам бүр мэдэрч байгаа. Намайг шагнал авахад хамаатнууд минь олноороо ирсэн. Тэр дундаа би өндөр настай эмээгээ, ээжийгээ Төрийн ордонд оруулж, алдар нэрээ дуудуулсанд бүр баяртай байгаа. Миний овог нэрийг дуудахад ээж минь надаар бахархаж уйлсан. Тэгээд тэнд байсан бүх хүн намайг баатар хэмээн дуудаж, баяр хүргэсэн нь миний хүүхэд насны хамгийн нандин, гэгээн, мартагдашгүй дурсамж болон үлдсэн. Зургадугаар сарын 1-нд надтай хамт 16 хүн шагнал авсан. Тэр дунд би ганцаараа хүүхэд байсан болохоор хамт шагнал авсан хүмүүс хүртэл над дээр ирж баяр хүргэсэн.

-Ангийнхаа найзын гэр бүлийнхнийг угаартахаас аварсан тэр үеийнхээ тухай ярьж өгвөл?

       -Би хичээлдээ явах болгондоо Б.Ариунзаяа найзыгаа дуудаад хичээлдээ хамт явдаг юм. Надаас гадна хоёр найз минь тэдний гадаа цугларч дөрвүүлээ хамт хичээлдээ явдаг. Дөрөвдүгээр сарын 23-ний өглөө би Б.Ариунзаяаг дуудахаар гэрт нь ортол гэр нь битүү утаа болчихсон, сонин үнэр ханхалж байсан. Тэгээд Б.Ариунзаяаг дуудаад сэрэхгүй болохоор нь ээжийг нь 5-6 удаа дуудсан. Сэрэхгүй болохоор нь гэрийнх нь нөгөө талд байдаг цагдаагийн газар очиж мэдэгдэе гэж бодоод дахин чанга дуудтал ээж нь сэрсэн. Арайхийж сэрсэн даруйдаа хүүхдүүдээ сэрээсэн. Б.Ариунзаяа ээж, дүү нараасаа өөр өрөөнд унтаж байсан болохоор тэднээс арай бага хордсон байсан. Ээж нь сэргэсэн даруйдаа хүүхдүүдээ сэрээчихээд түргэн дуудсан. Б.Ариунзаяагийн хордлого бага байсан учир хичээлдээ явж, ээж дүү нар нь эмнэлэгт хэвтэн эмчлүүлсэн. Тэд утаанд хордсны улмаас бөөлжиж, дотор нь муухайрч, толгой нь эргэж байсан гэсэн. Уг нь тэднийх хаалгаа байнга түгжиж хонодог байсан. Тэр шөнө хаалгаа түгжээгүй хоносон байсан учир би гэрт нь шууд орж, тэднийг сэрээж чадсан.

-Тэд чамд баярласан сэтгэлээ хэрхэн илэрхийлсэн бэ?

        -Тухайн өдөр Б.Ариунзаяагийн ээж нь манай ээж рүү ярьж “Танай охин өнөө өглөө бидний амийг аварлаа. Охинд нь маш их баярлаж байна. Танай охин манайд орж ирээгүй байсан бол эсвэл биднийг сэрээж чадаагүй бол бид амь эрсдэх дөхсөн байсан” гэж ээж рүү ярьсан байсан. Тэгээд тэд миний тухай ярьж уйлсан гэсэн. Мөн Б.Ариунзаяагийн ээж олон нийтийн сүлжээнд миний тухай бичиж, баярласан сэтгэгдлээ илэрхийлж байсан юм.

-Хэрвээ чи өглөө болгон цагтаа босож, замаараа найзыгаа дуудаж хичээлдээ явдаггүй байсан бол тэдний амийг аварч чадахгүй байсан байх?

      -Харин тийм ээ. Ээж минь намайг “Хариуцлагатай, шударга, үнэнч зан чанар нь олон хүний амь аварлаа даа, миний охин” гэж хэлсэн. Тэр өдөр найзыгаа дуудахгүй явчихсан бол яах байсан бол гэхээс дотор харанхуйлаад байдаг. Найзыгаа өглөө бүр дууддаг байсандаа би өөртөө баярлаж байгаа.

-“Шударга журам” шагналаар шагнуулахаасаа өмнө Тэргүүний сурагч тэмдгээр шагнуулсан байсан. Тэрхүү шагналынхаа тухай ярьж өгөөч?

        -Би энэ жил Эрдмийн хөтөч сургуулийн тавдугаар ангийг төгсөж байгаа юм. Манай хонхны баяр тавдугаар сарын 1-нд болсон. Намайг хичээлдээ онц байснаас гадна таван хүний амь аварсан гээд Сурагчдын холбооноос Тэргүүний сурагч медалиар шагнасан. Мөн намайг сургуулийн захиргаанаас Ерөнхийлөгчийн Тамгын газар руу тодорхойлолт явуулж Шударга журам шагналаар шагнасан.

-Чи ямар хичээлдээ илүү сонирхолтой вэ. Ямар мэргэжилтэй хүн болно гэж мөрөөддөг вэ?

     -Би монгол хэл, англи хэл, дүрслэх урлагийн хичээлдээ илүү сонирхолтой. Зурах  дуртай болохоор зураач болно гэж боддог.

-Мөрөөдлөө заавал биелүүлээрэй. Амжилт хүсье.

    -Баярлалаа.