Сэлэнгэ аймгийн Баянгол сумын Эрүүл мэндийн төвийн дарга М.Баярмаа дүүгийнхээ “Алдар эхийн одон”-гийн баярт ирэх үеэрээ  Хан-Уул дүүргийн тэмээтэй хөшөөний хажууд машинд мөргүүлж, осолдсон охинд анхны тусламж үзүүлж, эмнэлгийн байгууллагад хүлээлгэж өгчээ. Түүний энэ үйлдлийг сошиал орчинд хүмүүс бахархан хүндэтгэж, хайрлаж байгаагаа илэрхийлж буй. Бид түүнтэй холбогдож цөөн хором ярилцлаа.

-Сайн байна уу. Болсон үйл явдлын талаар мэдээлэл өгөөч. Чухам юу болсон юм бэ?

            -Би ганц охин дүүтэй. Өнөөдөр дүү минь Төрийн ордноос алдарт эхийн одонгоо гардаж авсан сайхан өдөр тохиож байна. Дүүдээ баяр хүргэхээр Сэлэнгэ аймгаас ирсэн. Талбайн зүг явж байх үед манай машинаас гурван машины урд мотоциклтэй хүн машинд мөргүүлсэн. Хамт явж байсан ахдаа машинаа үлдээгээд өөрөө гялс үсэрч буугаад очсон.  Би байнга яаралтай тусламжийн цүнхээ авч явдаг. Өнөөдөр шиг өдөр хэрэг болдог юм.

-Таныг очиход биеийн байдал нь ямархуу байсан бэ?

           -Намайг очиход охин хөдөлж чадахгүй байсан. “Үхсэн байх вий” гэж айж, сандарсан ч  азаар ухаантай “Цээж хэсэгт өвдөж байна” гэж хэлсэн.  Биднийг тэгэх зуурт ойр хавийн  хүмүүс түргэн тусламж дуудсан байсан л даа.  Би охинд “Хавирга чинь хугарсан байх магадлалтай. Ярьж болохгүй” гэж зөвлөөд анхны тусламж үзүүлж, өвдөлт намдаах тариа хийж өгөөд түргэний эмч нар ирэхээр нь хүлээлгэж өгсөн. Цагдаа нар “Эмчдээ баярлалаа” гэж байсан.

-Та эрүүл мэндийн салбарт хэдэн жил ажиллаж байгаа вэ? 

            - Би хүний Гавьяат эмч С.Алтансүх багшийн шавь.  2015 оноос хойш яаралтай тусламжийн эмчээр ажиллаж байгаа. Харин Сэлэнгэ аймгийн Баянгол сумын Эрүүл мэндийн төвийн даргаар 10 дахь жилдээ ажиллаж байна.

-Та яагаад яаралтай тусламжийн эмч болохыг зорьсон юм бэ?

            -Манай сумаар өдөр дунджаар 10 мянган тээврийн хэрэгсэл дамжин өнгөрдөг. Тэр чинээгээрээ осол их болдог газар.  Тиймдээ ч яаралтай тусламжийн эмч болохоор шийдсэн дээ. Яаралтай тусламж үзүүлэх зургаан минутад эмч хүн эрлэгийн элчтэй тэмцэлдэж, өвчтөнөө авардаг. Тийм чухал, хариуцлагатай ажил болохоор энэ мэргэжилдээ маш их хайртай.

-Өнгөрсөн хугацаанд таны очиж байсан хамгийн хүнд дуудлага ямар дуудлага байсан бэ?

            -2016 онд эмч болоод удаагүй байхдаа шөнө жижүүрт хоносон. Тэр өдөр нэг том осол болсон. Яваад очтол осолд орсон хүн аав минь байсан. Тэр дуудлага миний амьдралын хамгийн хүнд дуудлага байсан даа. Аавыгаа аварч чадаагүйдээ харамсаж явдаг. Эмчээр ажиллахаа болимоор үе байсан ч “Өвдсөн, тэвдсэн улсад би хэрэгтэй шүү” гэж бодоход урам зоригтой болдог. Би аавыгаа аварч чадаагүй ч өөр нэгэн гэр бүлийг элэг бүтэн үлдээхийн төлөө хичээж ажиллахаар шийдсэн.

-Ярилцсанд баярлалаа.

           -Баярлалаа.