Монголын анхны “Балдорж” шагналт редакц, МСНЭ-ийн “Ган үзэг” шагналт “Оюунлаг эргэлт медиа групп”-ийн дэргэдэх Ergelt.mn мэдээллийн сайтын сэтгүүлчид “Сүүлчийн нүүдэлчид” номоо монгол, англи хэлээр хэвлүүлэн, дэлхийн уншигчдад хүргэж байгаа билээ. Тодруулбал, одоогийн байдлаар бид номоо Унгар, Чех, Женев, Парис, Австри Итали Улсад амжилттайгаар нээгээд байна. Мөн өнгөрсөн нэгдүгээр сард эх орондоо нээж, уншигч, үзэгчтэйгээ уулзалт зохион байгуулсан юм.

  "Сүүлчийн нүүдэлчид" хөрөг ном нь баларч хуучраагүй нүүдэлчин ахуй, өв уламжлалыг орчин цагийн соёл иргэншилтэй хослуулан амьдарч буй монголчуудын гайхамшигт амьдралын онцгой төлөөлөл болох эх орныхоо эзэнгүй талд 40 жил давс олборлон, нөхөрлөж байгаа дөрвөн хөгшний байгалиа хамгаалах тэмцэл, нөхөрлөлийн гэгээн түүх, хоёр километрийн цаадахыг түвэггүй хардаг монгол хүн, хүн, амьтдын мөрийг алдалгүй хэлж чаддаг мөрч эмэгтэйн улсынхаа аюулгүй байдлыг хамгаалалцсан домогт ажиллагаанууд, дэлхийд гайхагдсан уурхайн ордуудыг нээн илрүүлэгч, хосгүй урлаач, буйдхан суурингийн сургуулиас ирээдүйд дэлхийн суутан болох мөрөөдөлтэй бяцхан сурагчид тэргүүтэй ховор амьдралын эздийн баримтаас сэдэвлэсэн хөрөг бүтээлийн чуулган юм.

Номонд, 

    Эргэлт.мн мэдээллийн сайтын Ерөнхий эрхлэгч Э.Хүрэлбаатарын “Би Монгол Улсаа дэлхийн хамгийн том орон гэж боддог буюу Хануйн бага сургуулийн сурагчид”, “Хөвчийн харыг хаа таарсан газраа өчиггүй бууд..” “А.Уранбаяр хүүгийн ширэнгэн ойд өнгөрүүлсэн 11 хоног” хөрөг сурвалжилга,

Ерөнхий редоктар Б.Энхмартын “Цас, амьдралын зудан дундуур”, “Усчин хүү Тулгаа” хөрөг,

Cэтгүүлч Б.Цогтбаярын “Цасан дундах цагаан халаадтан”, “Охиндоо өгсөн түүний амлалт” хөрөг,

Сэтгүүлч Д.Чанцалдуламын “Давс үүрсэн 40 жил”, “Хувьцааны гол тоглогч буюу хогийн цэгийн тэрбумтан С.Чулуун” хөрөг,

Сэтгүүлч Б.Бадралмаагийн “Хилчдийн домог мөрч Л.Сүхээгийн амьдралын мөр”, “Мөнх цаст Хархираа уулын өврөөс Хар Тарвагатайн шил хүрэх тэмээтэй нүүдэл” хөрөг,

Cэтгүүлч Гүнжидийн “Нүүрсний арьсаа баавгайд хуулуулж, 200 гаруй оёдол тавиулж, амьд үлдсэн Б.Жамсран”, “Осгож, зүрх нь зогссон хүүг амьдруулсан эмч” хөрөг,

Сэтгүүлч Н.Отгонбаатарын “Дахин давтагдашгүй морин хуур”, “Эмээгийн авдраас олдсон оньсон тоглоом” хөрөг

Сэтгүүлч Д.Бямбасүрэнгийн “Тэнгэрийн араншиг танигч”, “Сургуульдаа мориор явдаг ах дүү хоёр” хөрөг

Сэтгүүлч О.Эрдэнэтунгалагийн “Сургуулийн галч”

Сэтгүүлч Х.Доржпаламын “Хөгшин хээрээ хөтөлсөн буурал чаргачин”, “Говийн бор толгод дундаа хэдэн янгираа услаад зогсох шиг жаргал алга даа, дүү минь” хөрөг сурвалжилга тэргүүтэй 32 бүтээл багтсан билээ.

      Тэгвэл Эргэлт.мн мэдээллийн сайтын сэтгүүлч, уран бүтээлчдийн бүтээлийг эмхэтгэсэн “Сүүлчийн нүүдэлчид” ном маань 39 дэх Үндэсний номын баярын “УЛААНБААТАР ГРАНТ”-д нэр дэвшлээ. Энэхүү грантын зорилго нь номын соёлыг түгээн дэлгэрүүлэхэд нийгэмд бодитой хувь нэмэр оруулж буй хувь хүн, гадаад оронд номоо эрхлэн хэвлүүлж Mонгол Улсаа сурталчилж буй зохиолч, хэвлэн нийтлэгчдэд НЗДТГ-аас олгодог мөнгөн урамшуулал юм. Одоогийн байдлаар таван хэвлэн нийтлэгч энэхүү урамшууллыг хүртсэн бөгөөд номын баяр болгоноор нэг нэр дэвшигчийг тодруулдаг билээ.