Монгол Улсын математикийн 62 дахь удаагийн олимпиад Баянхонгор аймагт амжилттай зохион байгуулагдаж байна. Чансаа өндөр тус олимпиадад нийслэлийн есөн дүүрэг, 21 аймгийн 164 сурагч, 64 багш, Монголын математикийн олимпиадын хорооны 33 гишүүн оролцож, мэдлэг, ур чадвараа сорин өрсөлдөж байгаа аж. Оюуны спортын олимпиадыг “Эрдэнэ Монгол” ХХК ивээн тэтгэн ажиллаж байна.  

           Математикийн олимпиад нь математик сэтгэлгээг хөгжүүлэх, авьяаслаг сурагчдыг нээн илрүүлэх, цаашлаад олон улсын олимпиадад оролцох суурийг бэхжүүлэх өндөр ач холбогдолтой арга хэмжээ юм. Мөн орон нутагт зохион байгуулагдаж буй нь боловсролын хүртээмжийг нэмэгдүүлж, бүс нутгийн хөгжилд бодит хувь нэмэр оруулж байгаагаараа онцлог болжээ. Мөн математикийн олимпиод нь Баянхонгор аймагт хоёр дахь удаагаа зохион байгуулагдаж байгаа. Баянхонгор аймгийн удирдлагууд оюуны спортын улсын олимпиадыг орон нутагтаа хийхээр хоёр жилийн өмнөөс санал санаачилга өрнүүлэн, улмаар эрхээ албан ёсоор  авснаар "Хонгорын математик" төсөлт арга хэмжээг эхлүүлж,  бэлтгэл ажлаа багагүй хугацаанд хангаж, улсын олимпиадыг 30 жилийн дараа орон нутагтаа зохион байгуулж байна.

     “Эрдэнэ Монгол” ХХК нь ирээдүйн инженер, судлаач, шинийг санаачлагч залуусыг дэмжих, боловсролын чанар, хүртээмжийг нэмэгдүүлэхэд чиглэсэн санаачилгуудыг хэрэгжүүлэн ажилладаг бөгөөд энэ хүрээнд улсын математикийн 62 дахь удаагийн олимпиадын ивээн тэтгэгчээр ажиллаж байна.