Дорнод аймгийн Халхгол суманд цасан шурганаар хоёр малчин амиа алдсан харамсалтай осол боллоо. Тодруулбал, Халхгол суманд гэр бүлийн гурван хүн төөрч, эхнэр нь нас баржээ. Мөн гэрээсээ гарч, малын хашаа руугаа явсан 71 настай иргэн осгож, амиа алдсан байна.

Энэ талаар Халхгол сумын Засаг дарга Э.Бямбажаргалаас тодруулахад, “Нэг гэр бүлийн гурван хүн цусан шуурганд төөрч, осгосон. Харамсалтай нь, 51 настай эмэгтэй амиа алдсан. 11 настай хүүхдийг аавынх нь хамт аймгийн эмнэлэгт хүргэсэн. Одоогийн байдлаар эмчилгээ хийлгэж байгаа. Мөн 71 настай иргэн цасан шуурганаар сураггүй болсон. Харамсалтай нь, цогцсыг нь өнөөдөр оллоо. Халхгол суманд нүдгүй шуурга хоёр өдөр боллоо. Тэнгэр өнөөдрөөс онгойж байна. Сумын онцгой комиссынхон ажиллаж, хэчнээн хэмжээний хохирол учирсныг тогтооно” гэлээ.