Улаанбаатар хотод 7, 8-р сард халуун өдөр үргэлжилсний дараа гэнэт их хэмжээний бороо ороход төв замууд үерт автдаг. Учир нь хөрс хатаж, ус нэвтрэхгүй болдог ба ус зайлуулах систем муу ажиллаж байгаа нь үерийг нэмэгдүүлдэг. Халуун үед газар, агаар ихээр халж нарны хүчтэй туяанд газар маш их халж, ус ууршина. Агаар халах үед их хэмжээний усны уур агаар мандалд хуримтлагдсаны дараа нь хур тунадас хэлбэрээр гэнэт, их хэмжээгээр буух шалтгаан болдог. Мөн дараах шалтгаанууд бий.

• Хөрс хатаж, нэвчилт мууддаг. Хэт халуун өдрүүдэд хөрс хэтэрхий хуурайшдаг, бүр хагардаг ч байж болно. Ийм хатсан хөрс борооны усыг нэвчүүлж шингээж чаддаггүй. Тиймээс ус шууд урсаж, хурдан хугацаанд гадаргын урсгал үүсгэнэ.
• Гэнэт орсон бороо нь эрчимтэй байдаг. Халууны дараах бороо ихэвчлэн “аадар” буюу богино хугацаанд их хэмжээний ус оруулдаг. Энэ нь хот суурин газар, жалга, голын сав газарт хурдан цугларч үер үүсгэдэг.
• Хотын зам, суваг шуудуу бөглөрсөн байдаг. Асфальт, бетон гадаргуу нь ус шингээдэггүй. Хог хаягдлаас болж ус зайлуулах хоолой, шуудуу бөглөрсөн үед бороо шингэх боломжгүй болдог. Энэ нь үерлэлтэд нэмэр болдог.

-ҮЕР УСНЫ АЮУЛААС ХЭРХЭН СЭРГИЙЛЭХ ВЭ? -

1. Үер усны аюулаас урьдчилан сэргийлэх сэрэмжлүүлэг, мэдээ, дохиог хэвлэл мэдээллийн хэрэгсэл, мэдээллийн бусад эх сурвалжаас тогтмол хүлээн авч сэрэмжлэх, бусдад дамжуулах
2. Тэнгэрийн байдал, үүл, салхины чиг, мал амьтны хөдөлгөөн, араншинг шинжих гэх мэт үер усны аюулаас урьдчилан сэргийлэх уламжлалт аргаас суралцах
3. Гэр, хашаа, саравч, орон байрыг үерийн усны зам, голын гольдрол, гуу, жалга, хуурай сайр, ус хальдаг эрэг, татамд барихгүй байх
4. Үерийн аюултай бүс нутгаас нүүх
5. Үер, усны аюулаас хамгаалах далан, суваг, шуудуу, хашлага барих
6. Үер, усны аюулын талаар хүүхдэд анхааруулга, сэрэмжлүүлэг өгөх
7. Хүүхдийг хараа хяналтгүйгээр гол мөрөн, нуур, цөөрмийн орчимд тоглуулахгүй, орхихгүй байх
8. Чухал бичиг баримт, үнэт зүйлсээ үерийн усанд урсах, норохоос хамгаалсан найдвартай газар хадгалах, түүнийг гэр бүлийн гишүүд мэддэг байх
9. Цэвэр ус болон хүнсний нөөц, дулаан хувцсыг усанд автахааргүй орчинд хадгалах
10. Гэнэтийн ослын болон эд хөрөнгийн даатгалд хамрагдах
11. Өндөр хүчдэл, цахилгааны дор гэр, сууцаа барихгүй байх

-ҮЕР, УСНЫ АЮУЛЫН ҮЕД ЮУ ХИЙХ ХЭРЭГТЭЙ ВЭ?-

1. Үерийн аюулаас хамгаалах уламжлалт аргыг ашиглан эрүүл мэнд, амь нас, эд хөрөнгөө аврах, хамгаалах /гэрийн хаяагаа шуух, бэхэлгээ хийх, тогоо хөмрөх, хүүхэд, жирэмсэн эх, өндөр настан, хөгжлийн бэрхшээлтэй хүмүүсийг аюулгүй газар байлгах/
2. Байшингийн дээвэр, ургаа мод зэрэг аль ойрхон өндөрлөг газар гарах
3. Үер бууж болзошгүй хавцал, хонхор, нам дор газраас хол байж аль ойр байгаа өндөрлөг гарч тэндээ хүлээх
4. Цахилгаан хэрэгслийг хүчдэлээс салгах
5. Усархаг, үргэлжилсэн хүйтэн бороотой үед болон аадар, мөндөр орж байхад мал хариулах, эрэлд явах, аян замд гарахыг хойшлуулах
6. Өрх гэрт гарсан хохирол болон өөрт байгаа мэдээллийг, холбогдох байгууллага /эрүүл мэнд, онцгой байдал, нутгийн захиргаа гэх мэт/-д мэдээлэх, бусдад хүргэх
7. Гол мөрөн үертэй үед усанд орох, гол гатлах, зугаалах, аж ахуйн үйл ажиллагаа эрхлэхгүй байх, загасчлах, мал услах, туухгүй байх

-ҮЕР, УСНЫ АЮУЛЫН ДАРАА ЮУ ХИЙХ ХЭРЭГТЭЙ ВЭ?-

1. Өөртөө болон бусдад туслах
2. Эвдэрч нурсан газраас холдож аюулгүй газар очих
3. Шаардлагатай бол эмнэлгийн байгууллагад хандах
4. Үерийн усаар халдварт өвчний нян тээгддэг тул цэвэрлэгээ хийх, энэ ажилд мэргэжлийн байгууллагаас туслалцаа авах
5. Барилга байгууламжийн гадуур устай байвал дотогш оролгүй хүлээх
6. Үерийн ус барилгын суурийг гэмтээж, барилга нурах аюултайг анхаарах
7. Хийн шугам гэмтэж хий алдагдах, цахилгаан дулаан болон цэвэр усны шугам сүлжээ эвдэрсэн байх магадлалтай тул холбогдох мэргэжлийн байгууллагаас зөвшөөрсөн тохиолдолд гэртээ эргэж очих
8. Ундны усыг заавал буцалгаж хэрэглэх
9. Гараа тогтмол савандаж угаах
10. Үерийн усанд норсон хүнсний бүтээгдэхүүнийг устгах, хоол хүнс бэлтгэдэг болон ахуйн хэрэглээний сав суулгыг буцалгаж ариутгах
11. Булаг, худгийн усыг шавхаж цэвэрлэх
12. Гэр хороололд амьдардаг бол бие засах газар, муу цсны нүх /сав/-ийг ариутгах, цэвэрлэх гэх мэт