СУУРИЙГ НЬ ТАВЬСАН 1008 АЙЛЫН ОРОН СУУЦ БОЛОН ХҮЛЭЭЛТ ДҮҮРЭН ШИНЭЭР БАРИХ ЦЭВЭРЛЭХ БАЙГУУЛАМЖ

2022-08-09, 693

БНХАУ-ын буцалтгүй тусламжийн хүрээнд Нийслэлийн Сүхбаатар дүүргийн IX хорооны Ногоон нуур орчмын 4.2 га талбайд орон сууц барих ажил эхлээд хоёр сарын хугацаа өнгөрч буй. Гэр хорооллыг орон сууц болгох томоохон бүтээн байгуулалтын нэг нь энэ. Тэгвэл Барилга хот байгуулалтын сайд Б.Мөнхбаатар өчигдөр “Ногоон нуур-1008 айлын орон сууц” төслийн барилгын ажилтай танилцаж, тулгарч байгаа асуудлыг нь сонслоо. Нийт 30 сарын хугацаанд хийгдэх төлөвлөгөөтэй 2024 он дуусахад айлуудад нь шинэ байрных түлхүүрийг хүлээлгэн өгөх зорилготой байгаа тус ажил биднийг очиход суурь тавих ажлаар ид өрнөж байв.

Нийт 1008 айлын найман блок орон сууц барих энэхүү төсөл нь энэ оны сүүл сар гэхэд зургаан давхар руу гаа орох ёстой гэдгийг салбарын сайд онцлон өгүүлж байв. Гэр хорооллын асуудлыг арай хялбар, амраар шийдвэрлэх, иргэдийг тохь тухтай орчинд амьдрах боломжийг олгож байгаагаараа орон сууцын давуу тал нь оршдог. Энэ ч утгаар 2024 он гэхэд Ногоон нуур орчмын 1008 айл орон сууцанд орно гэдэг том боломж. Ногоон нуур орчмын бүтээн байгуулалтуудаас бидний сайн мэдэхээр Хангай хотхон бий. Эл орон сууц мөн л гэр хорооллыг орон сууцжуулах зорилгын түрүүч хэсэг. Энэ мэтээр гэр хорооллыг орон сууцжуулах ажил өрнөсөөр байна. Барилга хот байгуулалтын сайд Б.Мөнхбаатар тус орон сууцны ажлын нөхцөл байдалтай танилцан дараах мэдээллийг сэтгүүлчдэд өглөө. Тэрбээр “Ногоон нуур орчмын 4.2 га талбайд 1008 айлын найман блок орон сууц барих ажлын суурь тавих ажил нь явж байна.

Ногоон нуур бол Улаанбаатар хотын хамгийн их хөрсний устай газар.

Чингэлтэй уулаас урсаж ирдэг бүх гуурс энд цуглардаг. Энэхүү төслийн ажил энэ оны зургадугаар сараас албан ёсоор эхэлсэн. Төлөвлөгөө ёсоор бол энэ оны сүүл гэхэд барилгын ажил зогсох үед зургаан давхарт орсон байх ёстой. Төслийн удирдах нэгжүүд тулгамдаж байгаа асуудлаа танилцуулж байна. Тухайлбал, суурь хийсний дараа олон тоног төхөөрөмж БНХАУ-аас ирэх ёстой. Энэ Гааль дээр үүсэж байгаа асуудлыг бид аль болох шийдэх чиглэлээр ажиллана гэж ойлгож байгаа.

Энэхүү төсөл 30 сар үргэлжлэнэ гэхээр 2024 оны арванхоёрдугаар сар гэхэд найман блок орон сууц иж бүрэн тохижилттойгоор дуусахаар төлөвлөсөн. Мөн бид сургууль, цэцэрлэг мөн төлөвлөсөн байгаа. 4.2 буюу үндсэндээ 5 га газар гэдэг бол нийслэлийн хувьд их том.

Бид нар Улаанбаатар хотод Баянзүрх дүүргийн 25-р хороо 13 хорооллын урд талын гэр хорооллыг төлөвлөлтгүй байж байгаад алдсан. Энэ алдаагаа давтмааргүй байгаа юм. Өөрөөр хэлбэл, 1008 айлын орон сууц баригдсаны дараа тодорхой хэсгийг нь газрыг чөлөөлөх байдлаар ойр хавийн айлуудыг оруулж, газрыг гаргаж авах ёстой. Энэ төслөөс 100 метрийн цаана Үндэсний урлагийн их театр баригдах, газар чөлөөлөх ажил хийгдэж байгаа. Мөн 3.1 хувийг нь түрээслэх, тодорхой хэмжээнд зарж, борлуулах гээд орон сууц баригдаад, ашиглалтад орох үед дараагийн менежментийг ярих ёстой. Хил гааль дээр бараа гацах хүндрэл, цементтэй холбоотой тулгарч байгаа асуудлыг төслийн багийнхан тавьж байна. Бид энэ дагуу асуудлыг шийдээд явна. Өнөөдрийн байдлаар Ногоон нуурын барилгын талбайд 130 хүн ажиллаж байна. Аль болох бид эл төслийг амжилттай хэрэгжүүлэхийн төлөө холбогдох байгууллагынхантай нь уулзаж, шийдэж ажиллана” гэв. Ийнхүү бүтээн байгуулалтын ажил хил гаалийн асуудал, барилгын материалын үнэ өсөлтийн нөхцөл байдал зэрэг асуудал тулгарч байгаа ч тасалдалгүй хийгдсээр байгаа аж.

-ШИНЭ ТӨВ ЦЭВЭРЛЭХ БАЙГУУЛАМЖИЙГ БАРЬСНААР УЛААНБААТАР ХОТ НЭГ ДАХИН ТЭЛЭХ БОЛОМЖТОЙ-

Барилга хот байгуулалтын сайд барилгын салбарын томоохон хоёр төслийн ажлын явцтай танилцсаны нэг нь Ногоон нуур орчмын орон сууцны ажил бол дараагийнх нь Улаанбаатар хотын төв цэвэрлэх байгууламжийг шинээр барих төслийн барилга угсралтын ажил. Нийслэлийн өмнө тулгамдаж буй гол асуудлын нэг нь төв цэвэрлэх байгууламж. Энэ бол иргэдийн хүсэн хүлээж байгаа барилгын ажил. Сонгинохайрхан дүүргийн 20 дугаар хорооны нутат дэвсгэрт баригдаж байгаа энэхүү төслийн хөрөнгийг БНХАУ-ын Засгийн газраас Монгол Улсын Засгийн газарт олгох нэг тэрбум ам.долларын хөнгөлөлттэй зээлийн хэлэлцээрийн хүрээнд хэрэгжүүлэхээр шийдвэрлэсэн. Энэ талаар Барилга хот байгуулалтын сайд Б.Мөнхбаатар “Шинээр барих төв цэвэрлэх байгууламж нь хоногт 260.000м3 бохир усыг цэвэрлэх чадалтай. Өнөөдөр Улаанбаатар байгууламжийн цэвэрлэх байгууламж хоногт 160.000 м3 бохир усыг хүлээж авах ёстой байдаг. Ер судалгаагаар бохирын ус руу хөрсний ус орж ирэх зэрэг 150.000-170.000м3 бохир бол одоогийн ажиллаж байгаа цэвэрлэх байгууламжид ирдэг. Тэгэхээр хүчин чадал нь давчихсан.

Тиймээс өнөөдрийн ашиглагдаж байгаа цэвэрлэх байгууламжийн хажууд дахиад шинээр төв цэвэрлэх байгууламж барина гэдэг Улаанбаатар хот нэг дахин тэлэх эх үүсвэр БНХАУ-ын хөнгөлөлтэй зээлээр гүйцэтгэж байна.

Ерөнхий гүцэтгэгч компаниар Монгол 17 гүйцэтгэгч компани ажиллаж байна.

Энэ жил хотын төв цэвэрлэх байгууламжийг шинээр барих төслийн барилга угсралтын ажлын 80 гаруй хувийг хийхээр төлөвлөж байна. Барилгын гүйцэтгэгч компаниуд хид гаальтай холбоотой хүндрэлтэй асуудлыг танилцуулж байна. Энэхүү барилгын ажилд тавигдах том, том төхөөрөмжүүд чингэлэгт багтахгүй байгаа юм. Замын-Үүдээр зөвхөн кантнерт багтах бараа бүтээгдэхүүн ирж байгаа. Энэ асуудлыг нэгтгэж байгаад Засгийн газрын хуралдаанаар ярина. Монголын талаас Дарханы замын төсөл зэрэг томоохон төслүүдэд хийгдэж байгаа чингэлэгт багтахгүй том төхөөрөмжөө хэрхэн авах асуудлыг цогцоор нь шийдвэрлэхгүй бол болохгүй байгаа” гэв.

СУУРИЙГ НЬ ТАВЬСАН 1008 АЙЛЫН ОРОН СУУЦ БОЛОН ХҮЛЭЭЛТ ДҮҮРЭН ШИНЭЭР БАРИХ ЦЭВЭРЛЭХ БАЙГУУЛАМЖ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.