ОУОХ-ны гишүүн, МҮОХ-ны ерөнхийлөгч Б. Баттүшиг өчигдөр Сингапур Улсад зохион байгуулагдсан усанд сэлэлтийн дэлхийн аварга шалгаруулах тэмцээн /ДАШТ/-д оролцсон тамирчдын төлөөлөл болон Румын Улсад наймдугаар сарын 19-24-ний өдрүүдэд болох залуучуудын ДАШТ-д оролцох залуу тамирчдыг “Олимпик хаус”-т хүлээн авч уулзан, спортын амжилт хүслээ.

      Уулзалтад Монголын усан спорт сонирхогчдын холбоо /МУССХ/-ны тэргүүн дэд ерөнхийлөгч Р.Бадрах, дэд ерөнхийлөгч Ж.Энхтөр, ЕНБД С.Энхбаатар, МҮОХ-ны тэргүүн дэд ерөнхийлөгч Ч.Наранбаатар болон эцэг эхийн төлөөлөл оролцов.

     МУССХ-ны зүгээс “Хэдийгээр тогтмол бэлтгэл хангах нөхцөл бололцоо муу байгаа хэдий ч тамирчид маань хичээж, үр дүнд нь амжилт ахиж байна. Саяхан Сингапур Улсад зохиогдсон ДАШТ-нд манай гурван тамирчин “B” цагийн болзлыг хангаж оролцсоноос гадна 50 м болон 100 м -ийн араар даллах сэлэлтийн төрөлд Монгол Улсын рекорд, дээд амжилтыг шинэчлэн тогтоосон.” хэмээн мэдээлэл хийж, цаашид усан спортыг хөгжүүлэхэд хамтран ажиллах, шигшээ баг бүрдүүлэхэд дэмжлэг үзүүлэхийг хүсэв.

     МҮОХ-ноос “Сингапур-2025” ДАШТ-д амжилттай оролцсон баг тамирчдад баяр хүргэж мөнгөн шагнал гардуулснаас гадна цаашид МҮОХ-ноос МУССХ-той нягт хамтран ажиллах болно гэдгээ илэрхийлээд залуучуудын ДАШТ, “Бахрейн-2025” Азийн залуучуудын наадамд оролцох баг тамирчдад хувцас хэрэглэл гардууллаа.