БНХАУ-ын Засгийн газрын тэтгэлгийн 2025-2026 оны хичээлийн жилийн элсэлтийн урилга гардуулах ёслол наймдугаар сарын 13-ны өдөр өчигдөр  Монгол Улс дахь БНХАУ-ны ЭСЯ-д зохион байгуулагдав. Энэ жилийн хувьд нийт 76 оюутан БНХАУ-ын засгийн газрын тэтгэлэг авч Хятадын топ их сургуулиудад суралцах юм байна.

     БНХАУ-аас Монгол Улсад суугаа Элчин сайд, хатагтай Шэнь Миньжуань арга хэмжээг нээж үг хэлэхдээ “Оюутнууд та бүхнийг Хятад Улсад суралцах боломжоо нандигнаж, эзэмшсэн мэдлэг боловсролоо Хятад, Монгол хоёр орны найрамдал, хамтын ажиллагаанд зориулж, хоёр орны хувь заяаны хамтын нийгэмлэгийг бүтээн байгуулах үйл хэрэгт үнэтэй хувь нэмэр оруулахыг хүсэн ерөөе” гэлээ.

     Монгол Улсын Боловсролын сайд П.Наранбаяр хэлэхдээ “Улсын хөгжлийн үндэс болох хүний хөгжил, залуусын боловсрол, сайн сайхан ирээдүйд хөрөнгө оруулж буй БНХАУ-ын Засгийн газар, БНХАУ-аас Монгол Улсад суугаа Элчин сайдын яамны хамт олон та бүхэнд Монгол Улсын Засгийн газрын нэрийн өмнөөс, нийт оюутан, төгсөгч, тэдний гэр бүлийн нэрийн өмнөөс гүн талархал илэрхийлье.  Эрдмийн их аяндаа гарах гэж буй залуус та бүхэн амжилттай суралцахын зэрэгцээ юм үзэж, нүд тайлан, төгсөж ирснийхээ дараа эзэмшсэн боловсрол, мэдлэг туршлагаа ашиглан эх орондоо хөгжил дэвшил, эерэг өөрчлөлтийг авч ирээрэй. хэмээн захиж хэлье. Амжилтын дээд, эрүүл энхийг хүсэн ерөөе” гэв.

Эх сурвалж: "Анд" студи.