БОУУӨ-ИЙН САЙД АСАН С.ОДОНТУЯА ХОЁР ОРНЫ ДИПЛОМАТ ХАРИЛЦААНД ҮНЭТЭЙ ХУВЬ НЭМЭР ОРУУЛСАН ХЭМЭЭН АРАБУУДАД 12 АЙМГААС ШОНХОР АВЛАХ ЗӨВШӨӨРӨЛ ӨГЧЭЭ

        БОУУӨ-ийн сайд асан С.Одонтуяа тушаал гаргаж, шонхор авлах зөвшөөрөл гаргажээ. Үүнийг нь     БОУУӨ-ийн сайд Б.Батбаатар хэрэгжүүлж байгаа аж.  Ингэхдээ 12 аймгийн Засаг дарга, Байгаль орчин, аялал жуулчлалын газрын дарга нар, ан хариуцсан мэргэжилтнүүдтэй хуралдаж, онцгой анхаарахыг даалгасан байна. Тодруулбал, “Идлэг шонхор шувууг зөвхөн хоёр орны дипломат харилцааг хөгжүүлэхэд үнэтэй хувь нэмэр оруулсан гадаад орны төрийн өндөр, дээд түвшний албан тушаалтнуудад соёлын зориулалтаар буюу бэлэглэх журмаар бариулахаар Монгол Улсын Засгийн газрын тогтоолоор шийдвэрлэсэн байдаг. Иймд соёлын зориулалтаар агнах, барих идлэг шонхор шувууны тоо, толгойн хуваарийг харгалзан үзэж, Архангай, Баянхонгор, Говь-Алтай, Дорнод, Дундговь, Дорноговь, Завхан, Өвөрхангай, Сүхбаатар, Төв, Хэнтий, Хөвсгөл аймагт 2025 оны долдугаар сарын 20-ноос арваннэгдүгээр сарын 12-ныг хүртэлх хугацаанд Зөвшөөрлийн тухай хуулийн 1.3 дугаар зүйлийн 6-д заасны дагуу холбогдох зөвшөөрлийг олгож ажиллана уу” гэсэн утга бүхий албан бичгийг аймгийн удирдлагууд руу хүргүүлсэн гэнэ. Албан бичгийн дагуу арабууд шонхор авлаж эхэлжээ.

Эх сурвалжийн мэдээлж буйгаар “Арабууд 12 аймагт суурь судалгааны ажлаа эхлүүлсэн. Аймгуудын аль аль суманд отог байрлах нь тодорхойгүй байгаа. Тэд судалгааны ажлаа эхлүүлээд, дараа нь аль суманд отоглохоо шийддэг. Өнгөрсөн жил 350 шонхрын зөвшөөрөл өгч байсан. Энэ жил аймгийн Байгаль орчны газрын дарга нарт тоог нь тодорхой хэлээгүй байна лээ. Тэгэхээр өнгөрсөн жилийнхээс олон байж болзошгүй. Үүнийгээ холбогдох албаныхан ихэд нууцалж байгаа бололтой. Шонхрын ав долдугаар сараас эхэлсэн. Өвөрхангай, Говь-Алтай аймагт судалгааны ажлаа хийгээд, эхний отогоо байгуулсан байна гэсэн. Наймдугаар сарын 10 гэхэд арабууд отогоо эрчимтэй байгуулж, шонхороо хэдэн арваар нь бариад эхэлнэ. Тэд чинь нэг шонхор авч явах гэж нэлээн хэдийг барьдаг. Тэндээсээ шаардлагад нийцсэн, арабад очоод үнэ хүрэх, ховор шонхрыг нь авч үлддэг шүү дээ” гэв.

         Өөр нэг эх сурвалжийн мэдээлж буйгаар “Арабууд жил болгон ирээд хэдхэн шонхор бариад явсан нь тодорхойгүй байдаг. Үлийн цагаан оготно барьж иддэг ганц шувууг шилж, сонгоод өөрсдөө хэрэгтэйг нь авдаг. Таарсан шонхроо авахгүй шүү дээ. Зөвхөн цагаан хошуутай, нэн ховрыг нь л барьдаг юм. Ховор төрлийн шонхор нь зундаа Сибирийн тайга руу нүүдэлж, есдүгээр сарын эхээр Монголоор дайрч, халуун орон руу буцдаг. Энэ үед л ангаа өдөр, шөнөгүй хийдэг юм даа. Энэ хүмүүсийн гөрөөлөх ажиллагаа хүйтэн ортол үргэлжилнэ. Шонхроос гадна тагтаа, ногтруу хэдэн зуугаараа арабуудын зугаа цэнгэлд цаазлуулж байгаа. Гол өгөөш нь шүү дээ. Арабуудад авлуулах шонхрын тоогоо албаны хүмүүс ихэд нууцалдаг юм байна лээ” гэсэн юм.

АРАБУУД НЭГ ШОНХРЫГ 20 САЯ ТӨГРӨГӨӨР ҮНЭЛЖ, ОРОН НУТАГТ МӨНГИЙГ НЬ ТУШААДАГ

       Дээр дурдсан 12 аймагт шонхор авлах судалгааны ажил хийж байгаа. Тодруулбал, үлийн цагаан оготно хаагуур элбэг байгааг судалж байгаа гэсэн үг. Одоогийн байлаар Өвөрхангай аймгийн дөрөв, Хөвсгөл аймгийн хоёр, Дундговь аймгийн нэг суманд отог байгуулж, идлэг шонхор барьж байгаа гэнэ. Ингэхдээ нэг шонхрыг 20 сая төгрөгөөр үнэлж, орон нутагт мөнгийг нь тушаадаг ажээ.