Замын цагдаагийн өөдөөс Ц.Баярцогт гэх залуу салаавч гаргаж, хэл амаар доромжилж байгаа бичлэг олон нийтийн сүлжээнд тавигдснаас хойш шуугиан тариад байгаа. Өнгөрсөн сарын 21-ны өдөр 17-93 УБҮ улсын дугаартай “Ланд-200” маркийн машин урсгал сөрж явахад нь цагдаагийн албан хаагч зогсоосон гэнэ. Цагдаа бичиг баримтыг нь шалгаж эхэлсэн байдаг. Гэтэл тус машинд зорчиж явсан иргэн Ц.Баярцогт бууж ирэн цагдааг доромжилж эхэлсэн байна. Ингээд цагдаа руу салаавч гаргаж доромжилсон юм. Ц.Баярцогт цагдаагийн хажууд хэн нэгэн рүү утсаар ярин “Амрыг эрье” хэмээн мэнд мэдэнгээ, танай цагдаа бичлэг хийгээд байна, та ярьдаа” хэмээн цагдаагийн томоохон албан тушаал бүхий дарга руу гар утсаараа ярьсан билээ.

Ц.БАЯРЦОГТЫГ ШАЛГАЖ ЭХЭЛЖЭЭ

Энэ талаар Цагдаагийн ерөнхий газрын хэвлэл мэдээллийн төвөөс тодруулахад “Олон нийтийн сүлжээгээр хууль сахиулагчийг албан үүргээ гүйцэтгэж байхад нь түүний хууль ёсны шаардлагыг эсэргүүцсэн бичлэг цацагдсан. Энэ үйл явдал нь 2017 оны есдүгээр сарын 21-ний өдөр 16:00 цагийн орчимд болсон. Дээрх үйлдэлд эрүүгийн хэрэг үүсгэхээр цагдаагийн байгууллага шалгаж байна. Тухайн үед 17-93 УБҮ улсын дугаартай, “Ланд-200” маркийн автомашинд зорчиж явсан, цагдаагийн албан хаагчийн хууль ёсны шаардлагыг эсэргүүцсэн Ц.Б гэгчийн гаргасан хууль бус үйлдэлд нь Зөрчлийн тухай хуулийн 15.2 дугаар зүйлийн 2.3 дахь хэсэгт төрийн албан хаагчийг хүч хэрэглэхгүйгээр эсэргүүцсэн, эсхүл доромжилсон бол хүнийг 250 мянган төгрөгөөр торгоно, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ гэж заасны дагуу цагдаагийн байгууллага шалгалтын ажиллагаа хийж байна. Мөн 17-93 УБҮ улсын дугаартай, “Ланд-200” маркийн тээврийн хэрэгслийг жолоодож явсан Ц.Б-д тээврийн хэрэгслийн тусгай дуут дохиог зөвшөөрөлгүй ашигласан зөрчилд хуулийн дагуу Жолоочийн зөрчлийн бүртгэлийн арван онооноос гурвыг хасаж, Зөрчлийн тухай хуулиар 80 мянган төгрөгөөр торгох арга хэмжээ авсан. Цагдаагийн алба хаагчийн хууль ёсны шаардлагыг эсэргүүцсэн Б гэгч нь төрийн өндөр албан тушаалтан, улстөрчтэй хамаарал бүхий этгээд биш бөгөөд төрийн албанд ажилладаггүй гэдэг нь шалгалтын явцад тогтоогдсон” гэв. Өөр нэг эх сурвалжаас авсан мэдээллээр Ц.Баярцогт нь прокурор, цагдаад их танилтай нэгэн гэнэ. Тэрбээр өмнө нь хэд хэдэн хэрэгт шалгагдаж байсан ч танил талаараа дамжуулан ял завшиж байсан аж. Мөн замын цагдаа руу салаавч өгсний дараа цагдаагийн нэгэн хурандаа руу гар утсаараа залгаж ярьсан нь тодорхой болоод байгааг онцолж байв.

Ц.БАЯРЦОГТОД ЗАЛИЛУУЛСАН ГЭХ Д.БАТБАЯР ПРОКУРОРЫН ХУУЛЬ БУС ШИЙДВЭРИЙГ ЭСЭРГҮҮЦЭЖ СУДСАА ХАНАЖЭЭ

Төрийн цагдаа руу салаавч гаргаж, түмний дургүйцлийг хүргээд байгаа иргэнийг Ц.Баярцогт гэдэг юм байна. Тэрбээр хэдэн жилийн өмнө нэр, овгоо сольж, Чимгээ овогтой Баяртогтох болсон байна. “Саранфинанс” ББСБ-ын захирлаар ажилладаг байна. Тэрбээр Сэлэнгэ аймгийн Ерөө сумын Хуст нарийны амны алтыг хууль бусаар олборлодог аж. Хууль бусаар алт олборлож байхад нь цагдаагийнхан зогсоогоод эрүүгийн хэрэг үүсгэжээ. Мөн техникийг нь лацдаж битүүмжилжээ. Гэвч Ц.Баярцогт цагдаа нарын тавьсан лацыг нь таслаад үргэлжлүүлэн газраа ухсан гэнэ. Түүнийг хууль бусаар алт олборлосон, 160 гаруй сая төгрөг бусдаас залилсан хэргээр ирэх лхагва гаригт Сэлэнгэ аймаг дахь Эрүүгийн хэргийн анхан шатны шүүхээр гэм буруутай эсэхийг хэлэлцэх юм байна. Энэ талаар албаны эх сурвалжаас авсан мэдээллээр Сэлэнгэ аймгийн Мандал сумын Ялбаг багийн нутаг, Ерөөгийн байгалийн цогцолбор газарт хууль бусаар алт олборлосон хэрэгт “Баян суут” компанийн захирал Ц.Баярцогтыг шалгажээ. Тус компани нь нөхөн сэргээлт хийх нэрийдлээр Хуст нарийны голд алт олборлосноос болж гол ширгэн, ухсан нүхэнд нь мал унаж үхэх болжээ. Ц.Баярцогт нь иргэн Д.Батбаярт “Лицензтэй талбай байгаа” гэж итгүүлэн 115 сая төгрөгийг залилан мэхэлж авсан байдаг аж. Иргэн Д.Батбаяр цагдаад Ц.Баярцогтод залилуулчихлаа гэх утга бүхий өргөдөл өгчээ. Мөрдөн байцаалтаар Ц.Баярцогт иргэн Д.Батбаяраас ашиглалтын лицензийн талбайтай хэмээн итгүүлж, их хэмжээний хөрөнгө оруулалт хийлгэсэн байна. Д.Батбаяр өөрийнхөө болон ах, дүү хамаатан садангийнхаа орон сууцыг барьцаалан “Баян суут” компани руу 115 сая төгрөгийн хөрөнгө оруулалт хийсэн аж. Гэтэл тус компани хууль бус аргаар алт олборлож байгаа нь тогтоогдсон байна. Ингээд гаргасан мөнгөө авах гэсэн боловч чадаагүй байна. Арга буюу цагдаад хандаж, шалгуулжээ. Хэргийг шалгаж байсан мөрдөн байцаагчийг ямар нэгэн үндэслэлгүйгээр хэд хэдэн удаа сольжээ. Мөрдөн байцаах газарт шалгагдаж байсан хэргийг Нийслэлийн прокурорын газрын Нямдорж, Сандагсүрэн нар хэрэгсэхгүй болгох шийдвэрийг гаргажээ. Бүр хавтаст хэргийг нь архивт хийчихсэн байна. Үүнээс болоод иргэн Д.Батбаяр “Миний үхэлд Нийслэлийн прокурорын Сандагсүрэн, Нямдорж нар буруутай” гэсэн гэрээслэл бичиж амиа хорлох оролдлого хийж, судсаа ханасан байна. Иргэн Д.Батбаяр амиа хорлох үйлдэл гаргасантай холбоотойгоор хэрэгсэхгүй болсон дээрх хэргийг Прокурорын байгууллагаас дахин сэргээж, Эрүүгийн хуулийн 148.4, 214.2-т заасан бусдын онц их хэмжээний хөрөнгийг залилсан, хууль бусаар ашигт малтмал олборлосон гэсэн үндэслэлээр яллах дүгнэлт үйлдэн Сэлэнгэ аймаг дахь Эрүүгийн хэргийн анхан шатны шүүхэд шилжүүлжээ. Шүүх хурал ирэх лхагва гаригт болно. Түүнийг 148, 214 дүгээр зүйл ангиар буруутган шүүх гэнэ.

Ерөнхий сайдын үүрэг гүйцэтгэгч Ж.Эрдэнэбатыг албан тушаалаа урвуулан ашиглаж хууль бус шийдвэр гаргаж, 2013 онд Ц.Баярцогтыг хууль бусаар алт олборлох эрх өгсөн гэх үндэслэлээр АТГ-аас шалгасан байна. Ж.Эрдэнэбат Сэлэнгэ аймгийн Засаг даргаар ажиллаж байхдаа Дөтлүүрийн ам гэх газарт Ц.Баярцогтын компаниар нөхөн сэргээлт хийлгэх нэрийдлээр алт ухуулсан байна. Дээрх хэргийг хэрэгсэхгүй болсон байсныг мөн л сэргээн шалгаж дээрх хэрэгтэй нэгтгэн шүүх юм байна. Сэлэнгэ аймаг дахь эрүүгийн хэргийн анхан шатны шүүхээс Ерөнхий сайдын үүрэг гүйцэтгэгч Ж.Эрдэнэбатыг шүүх хуралд яллагдагчаар оролцуулах шийдвэр гаргасан гэдгийг эх сурвалж онцолж байв.