Монгол Улсаас Бүгд Найрамдах Итали Улсад суугаа Элчин сайд Д.Булган Хувийн эрх зүйг ижилтгэх олон улсын хүрээлэн (UNIDROIT)-ийн Ерөнхий нарийн бичгийн дарга профессор Игнацио Тирадотай 2026 оны долдугаар сарын 21-ний өдөр уулзаж хамтын ажиллагааны асуудлаар санал солилцов. Уулзалтын үеэр сүүлийн жилүүдэд Монгол Улс, Хувийн эрх зүйг ижилтгэх олон улсын хүрээлэн хоорондын хамтын ажиллагаа идэвхтэй хөгжиж буйг талууд онцлов.

   Монгол Улсын хувийн эрх зүйн орчныг боловсронгуй болгоход залуу боловсон хүчин сургах, дадлагажуулах чиглэлд үргэлжлүүлэн хамтран ажиллах, тус хүрээлэнгийн Нарийн бичгийн дарга нарын газарт Монгол Улсын залуу хуульчдаас дадлага хийлгэх зэрэг асуудлаар ярилцав.Түүнчлэн Элчин сайд Д.Булган Монгол Улсын гадаад бодлогын тэргүүлэх зорилтуудын нэг нь олон талт хамтын ажиллагаа төдийгүй олон улсын эрх зүйг бүрэн хүндэтгэн сахих нь манай чухал байр суурь болохыг илэрхийлэв.

   Хувийн эрх зүйг ижилтгэх олон улсын хүрээлэн (UNIDROIT) нь 1926 онд байгуулагдсан бөгөөд Монгол Улс 2023 онд гишүүнээр элссэн. Монгол Улс нь тус байгууллагаас баталсан “Олон улсын хоорондын авто замаар ачаа тээвэрлэх гэрээний тухай конвенц”-д 2003 онд элссэн. Мөн “Хөдөлгөөнт тоног төхөөрөмжийн олон улсын баталгаат эрхийн тухай конвенц”-д 2005 онд тус тус нэгдэн орсон.

   Профессор Игнацио Тирадо нь Хувийн эрх зүйг ижилтгэх олон улсын хүрээлэн (UNIDROIT)-ийн Ерөнхий нарийн бичгийн даргын албан тушаалд 2018 оноос томилогдон ажиллаж байна. Тэрээр Европын банкны хүрээлэн, Олон улсын өрийн удирдлагын хүрээлэн, Дампуурлын асуудлаарх америкийн коллеж зэрэг байгууллагыг үүсгэн байгуулахад оролцсон байна.