БНХАУ-д шинэ төрлийн коронавирус /covid-19/ гарч, Монгол Улсын Засгийн газар болон иргэд олон нийтийн зүгээс урьдчилан сэргийлэх олон төрлийн арга хэмжээг авч хэрэгжүүлж байна. Шинэ коронавирусийн тархалттай холбоотойгоор бодит биш мэдээллүүд цахим сүлжээгээр хөвөрч, хүнсний бараа бүтээгдэхүүний эрэлтийг өсгөж, тасалдах вий гэх болгоомжлолыг ард иргэдийн дунд бий болгож байгааг мэргэжлийн байгууллагаас сануулсан.

Энэ нөхцөл байдалтай холбогдуулан үндэсний томоохон сүлжээ дэлгүүрүүд хамтран албан ёсны мэдэгдэл гаргажээ. Тодруулбал, “Оргил”, “Сансар”, “Миний” сүлжээ дэлгүүрийн барааны эргэлт хэвийн нөөц хангалттай байгаа бөгөөд бараа бүтээгдэхүүнийг зохиомлоор нэмэх асуудал үүсэхгүй гэдгийг ард иргэддээ хариуцлагатайгаар мэдэгдэж байна. Мөн өнөөдрийн байдлаар Монгол Улсын худалдааны салбарт бараа бүтээгдэхүүний ямар нэгэн хомсдол үүсээгүй байна.

Үндэсний сүлжээ дэлгүүрүүд Засгийн газраас зохион байгуулж буй арга хэмжээнүүдийг дэмжин ажиллах болно гэдгээ мэдэгджээ.