Эрүүл мэндийн яамнаас коронавирусийн нөхцөл байдлын талаарх ээлжит мэдээллээ өгсөн. Энэ үеэр ХӨСҮТ-ийн Халдварт өвчний тандалт судалгааны албаны дарга Ж.Байгалмаа сэтгүүлчдийн асуултад хариуллаа.

-Орон нутагт коронавирусийн халдвараар өвчилсөн иргэдийг яаж, хэрхэн эмчилж байгаа вэ. ХӨСҮТ-өөс эмч, мэргэжилтнүүд очсон уу?

-Эрүүл мэндийн сайдын тушаалаар коронавируст халдварын эмчилгээ, тусламж үйлчилгээг баталсан байдаг. Энэ тушаал саяхан шинэчлэгдсэн. Тодруулбал, гуравдугаар сарын 18-ны өдрийн 150 тоот тушаалаар коронавирусийн эмчилгээг орон нутаг болон нийслэлд улсын хэмжээнд хийж байгаа. Зарим аймгууд нөхцөл байдлаасаа хамааран ХӨСҮТ-өөс мэргэжлийн баг ирүүлэх хүсэлт гаргасан. Одоогийн байдлаар Завхан аймгийн Шилүүстэй суманд коронавирусийн эмчилгээг амжилттай хийсэн. Үүнд тус аймгийн эмч ажилтан төдийгүй ХӨСҮТ-ийн эмч, ажилтан тусламж үйлчилгээ үзүүлсэн. Өвөрхангай аймгийн ЭМГ-ын хүсэлтийн дагуу ХӨСҮТ-өөс мэргэжлийн баг илгээсэн. Ерөнхийдөө аймаг, сумдын Эрүүл мэндийн газар бэлтгэлээ сайн хангасан учир халдвартай иргэдэд тодорхой хэмжээгээр эмчилгээ, тусламж үзүүлэх бололцоотой байгаа.

-Орон нутагт халдварын тохиолдол эрс нэмэгдвэл тэнд нь эмчлэх, тусгаарлах байр, эмч ажилтны нөөц бололцоо хэр байгаа вэ?

-Коронавирусийн батлагдсан тохиолдлын сүүлийн 24 цагт бүртгэгдсэн тоог харвал Дархан-Уул болон Архангай аймагт тархалт өндөр байгаа. Хэдийгээр эдгээр аймагт халдварын тохиолдол эрчимтэй нэмэгдэж байгаа ч хариу арга хэмжээг сайн авч байна. Тусгаарлах байрны нөөц бэлтгэж ойрын болон дам хавьтлын иргэдийг ажиглалтад аваад байна. Эмнэлгийн хувьд нэмэлт орны нөөцөө шаардлагатай тохиолдолд дэлгэхээр бэлтгээд байгаа.

-“Сэмжид Хужирт” сувиллын газарт амарсан иргэд 12 аймаг руу тархсан гэж мэдээлсэн. Энэ амралтын газартай холбоотойгоор хэдэн аймагт хэчнээн хүн коронавирусээр өвчилсөн бэ?

-Өвөрхангай аймгийн Хужирт сумын “Сэмжид Хужирт” сувиллын газарт гуравдугаар сарын 1-25-ны өдрүүдэд 13 аймгийн 174 иргэн амарсан. Өвөрхангай, Баянхонгор, Дархан-Уул, Увс, Хэнтий, Сэлэнгэ, Орхон, Хөвсгөл, Ховд зэрэг 13 аймагт гуравдугаар сарын 27-ны байдлаар нийт 62 хүнээс коронавирус илэрсэн.