ХӨСҮТ-ийн Дархлаажуулалтын албаны дарга О.Дашпагма вакцинжуулалтын талаарх мэдээллийг өглөө. Тэрбээр “Улаанбаатар хотод 40 цэгт 93 багийн 650 ажилтан өчигдөр буюу гуравдугаар сарын 27-нд 6257 иргэнийг дархлаажуулалтад хамруулсан байна. Ингэснээр улсын хэмжээнд нийт 276 мянга 68 иргэн дархлаажуулалтад хамрагдсан байна.

Үүнээс вакцинд хамрагдвал зохих 50-аас дээш насны иргэдийн 41.1 хувь буюу 101 мянга 007 иргэн вакцины эхний тунгаа хийлгэсэн байна

Дархлаажуулалтын ажил хэвийн явагдаж байгаа бөгөөд хариу урвал, хүндрэлийн тандалтыг зохион байгуулж буй. Тандалтаас харвал БНХАУ-ын Синофарм эмийн үйлдвэрийн Вероселл вакцины дараах хариу урвал дархлаажуулалтад хамрагдсан нийт иргэдийн 13 хувьд илэрч байна. Тодруулбал, халуурах, бие арзайх, тариулсан хэсэгт хөндүүрлэх зэрэг урвал илэрч байна. Харин АстраЗенека вакцины дараах хариу урвал иргэдийн 51 хувьд илэрч байсан. Ирэх дөрөвдүгээр сарын 10-наас Вероселл, 20-ноос АстраЗенека вакцины хоёр дахь тунг тус тус хийж эхэлнэ” гэв.