• Өнөөдөр 2022-01-22

Коронавирусийн ТОХИОЛДОЛ, ГОЛОМТУУДЫН МАРШРУТЫГ зарла, Эрүүл мэндийн яамныхан

2020-11-20,   853

Цар тахлын халдвар дотоодод анх илрэхэд жолооч Д болон түүний эхнэр, дүүгийн явсан маршрутыг дэлгэж байлаа. Түүнийг харсан иргэд хамаарал бүхий объектод явганаар зорчих эрсдэлтэй гэдгийг ухамсарлан, өөрсдийгөө ойрын болон дам хавьтал болох вий, халдвар авах вий хэмээн хамгаалж байсан юм. Харин Сэлэнгэ аймгийн иргэн Ц, жолооч Д нараас хойш дотоодод илэрсэн 100 гаруй иргэний явсан маршрутыг УОК болон Засгийн газраас одоог хүртэл зарласангүй.

100 гаруй иргэний явсан маршрутыг УОК болон Засгийн газраас одоог хүртэл зарласангүй

Тодруулбал, анх арваннэгдүгээр сарын 11-нд тусгаарлалтаас гараад байсан ТИР машины жолооч Д-гээс халдвар илэрч түүний эхнэр болон дүү, хадам ээж, хүүхэд гэх ойрын хавьтал халдвар авсан нь тогтоогдсон. Үүний дараа буюу арваннэгдүгээр сарын 12-нд Сэлэнгэ аймгийн иргэн Ц халдварын хоёр дахь голомт болж, түүний бэр болон ач хүү нараас халдвар илэрсэн. Одоог хүртэл иргэн Ц-г хаанаас халдвар авч, тээгч болсныг хариулах хүн алга. Тэрбээр Дархан-Уул аймгийн томоохон хүнсний зах, худалдааны төвөөр орсон байдаг. Түүнчлэн түүний бэр цэцэрлэгийн багш бөгөөд хариуцсан анги нь 29 хүүхэдтэй гэх мэдээлэл гарсан байдаг. Одоогоор тус аймагт батлагдсан тохиолдол 51 болоод байна. Гэтэл Эрүүл мэндийн яамнаас эдгээр иргэний нэгийнх нь ч маршрутыг зарлаагүй бөгөөд ойрын болон дам хавьтлын хэчнээн иргэн хаашаа тархсаныг мэдээлээгүй байна.   

Аймгуудад илэрсэн халдварын голомт хаанаас эхтэй вэ гэдэгт хариулах нэг ч хүн алга

Арваннэгдүгээр сарын 17. Дархан-Уул аймагт нэг тохиолдол бүртгэгдэж халдварын голомттой болов. Маргааш нь буюу арваннэгдүгээр 18-нд тус аймгийн онцгой комиссоос мэдээлэл хийх үеэрээ “Дархан-Уул аймаг дахь халдварын голомт төмөр зам дагаж илэрсэн гэдгийг 10 мянга гаруй хүнд хийсэн шинжилгээгээр тогтоогдлоо. Энэ салбарын ажилтантай холбоотой 10 иргэн халдвар аваад байна” гэж хэлсэн байдаг. Тэгвэл тус аймагт өнгөрсөн аравдугаар сарын 1, 2, 6, 30-ны өдрүүдэд төмөр замчдын спортын ур чадварын томоохон тэмцээнд 445 ажилтан, алба хаагч оролцсон. Одоогоор тус аймгийн батлагдсан тохиолдол 16 болоод байна. Мөн л бүгдийнх нь маршрутыг зарлаагүй, иргэд ямар аюултай газар явж байгаагаа мэдэх эрх нь хаалттай байсаар байна.

Арваннэгдүгээр сарын 18, 31 хүнээс коронавирус илэрч, Орхон, Говьсүмбэр, аймгууд халдварын голомтттой болов. Орхон аймгийн онцгой комисс шуурхай хуралдаж “13 хүний шинжилгээнээс коронавирус илэрсэн. Тэдний дийлэнх нь төмөр замын районд ажилладаг” гэдгийг хэлсэн. Тэгвэл одоогоор тус аймагт 13 тохиолдол батлагдаад байна. Үндсэндээ улсын хэмжээнд батлагдсан тохиолдол 555-т хүрч нэг өдрийн дотор 37 тохиолдол нэмэгдэн, батлагдав. Харин дотоодод батлагдсан тохиолдол 120 болоод байна.

2020.11.20-ны 11:00 цагийн байдлаар

Монгол Улсад 2020.03.09-өөс хойш “Ковид-19” цар тахлын нийт 555 тохиолдол батлагдав. Үүнээс:

-Эдгэрсэн 335

-Нутаг буцаасан 7

-Эмнэлэгт 213 иргэн хэвтэн эмчлүүлж байна.

Дотоодын кластер өвчлөл 120

- Улаанбаатар хотод 33 (Жолооч Д 14, УБТЗ 4)

- Сэлэнгэ аймагт 51

 - Дархан-Уул аймагт 16

-Дорноговь аймаг 6

 -Орхон аймаг 13

- Говьсүмбэр аймагт 1

Эмнэлэг, сувилал 9 (XӨСҮТ-8, Энхсаран сувилал-1)

Зөөвөрлөгдсөн өвчлөл: +2 \Өмнөд Судан, Алтанбулаг жолооч\

Халдвартай нэг иргэн хоногт хамгийн багадаа 10 гаруй газраар орж, гарсан байх болов уу. Тэгэхдээ хэчнээн хүнтэй таарч, халдвар тархаасныг хэн ч мэдэхгүй. Халдвар тараасан иргэдийг буруутгах аргагүй. Харин халдварын тархалтыг хумих үүрэгтэй УОК, Засгийн газраас өдийг хүртэлх тохиолдлуудын маршрутыг зарлахгүй байгаа нь иргэдийг аюултай газар явж байгаагаа мэдэлгүй дам хавьтал болох өндөр эрсдэлд оруулж байна. Өдөрт 10-30-аараа хаа сайгүй халдвар илэрч, хүрээгээ тэлсээр байгаа энэ үед халдварын шинээр бүртгэгдсэн голомт, тохиолдол бүрийн маршрутыг зарлаж, мэдээллээ тодорхой болгож, ажлаа хийсэн шиг хийнэ үү, Эрүүл мэндийн яам, УОК-ынхон.

УОК, Засгийн газраас өдийг хүртэлх тохиолдлуудын маршрутыг зарлахгүй байгаа нь иргэдийг аюултай газар явж байгаагаа мэдэлгүй дам хавьтал болох өндөр эрсдэлд оруулж байна

 


Коронавирусийн ТОХИОЛДОЛ, ГОЛОМТУУДЫН МАРШРУТЫГ зарла, Эрүүл мэндийн яамныхан
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188