УИХ-ын намрын чуулган өчигдөр завсарлаж, Саарал ордон эзгүүрлээ. Маргаашнаас товчоодоор том жийпүүд цувж, малчдын гэр дарга нараар дүүрэх нь. Сар шинийн баяраас урьтаж тойргоо услаж, сонгуулийн кампанит ажлаа хийх гээд гишүүдийн туслахууд зах худалдааны төвөөр өдөржин хөлийнхөө улыг өвдтөл гүйлдсэн гэх.

      УИХ-ын ээлжит сонгууль ойртох тусам гишүүд сонгогчдын саналыг татах гэж хэрэндээ хичээж байгаа нь энэ. Сар шинийн баяраар “Сайн малчин” “Мянгат малчин”, “Алтан төлийн эзэн” гэх сүржин нэртэй шагналуудыг тойргийг иргэддээ тараахаар Ерөнхийлөгчийн Тамгын газрын үүдэнд дугаарлаж эхэлсэн гэх яриа ч Саарал ордноор шивэр авир яригдаж байна.

       Жил болгоны өдийд малчдын гэрт том жийптэй, хурган дотортой дээлтэй дарга нар заларч шагнал тарааж, тууз гардуулдаг тогтсон уламжлал үйлчилж ирсэн. Ахмадууд нь ул боов, ууттай чихэр, оймсоо авахаар уулзалтад очиж, тавьсан илтгэлийг нь хоёр гараа хорстол алга ташин сонсоод уртаас урд дарааллыг хүлээж зогсож, ууттай бэлгээ авдаг өрөвдмөөр дүр зураг өдийд өрнөдөг нь ч нууц биш. Хариутай бол бариутай гэж Сар шинийн боов, бэлгээ түшээдээс гардаж авдаг ахмадууд сонгуулиар нь хариуг нь барих даалгавар хүлээдэг гээд хэлчихэд хэлсдэхгүй. Саяхан чуулганы хуралдаан дээр гишүүд “Сар шинийн баяраар хэдэн ахмаддаа бэлэг бэлгийн дээд бэлэн мөнгөө бариад золговол хууль зөрчсөн болох уу” гэх нүхээ малтаж байгаа нь ч харагдсан.

     Ингээд харахаар дөрвөн жилийн ирээдүйгээ ул боов, ууттай чихрээр сольдог ужгирсан тогтолцоо үргэлжилсээр байх нь.

      Энэ жил Үндсэн хуульд өөрчлөлт орж, гишүүдийн тоо нэмэгдсэн. Дээр нь тойрог томсож, бүсчилсэн сонгууль хийх эрх зүйн орчинг бүрдүүлээд байгаа юм. УИХ-ын гишүүдийн олонх нь ирэх сонгуульд горилж байгаагаа ч нуугаагүй. Ингээд тэд бүсчилсэн тойргийн сонгуульд бэлдэхээр яарч эхэллээ. Угтаа бол ганц аймгаар бэлэг тараадаг байсан бол дор хаяж гурван гурван аймгаар орж, өөрийгөө сурталчлах болох нь. Хэдий сонгуулийн сурталчилгааны ажил албан ёсоор эхлээгүй ч өөрийгөө таниулах ажлыг тайлан тавих нэрээр танилцуулж ирсэн уламлалтай. Тэгвэл энэ удаад томсгосон тойргийн гишүүд Сар шинээс өмнө шагнал гардуулж, тууз тараах гээд тун завгүй байцгаана. Энэ жил цаг хатуурч, зудтай аймаг олон байгааг ч хэлэх үү, туулах газар их байна гэлцээд эхнээсээ унаа машинаа сольж эхэлсэн гэх нь ч бий.  Ийн төрийн түшээд нар шагнал гардуулж, тууз тараах ажилдаа ханцуй шамлан орлоо.

    Өнгөрсөн жил Үндсэн хуулийг сурталдах гэж үсээ зулгаахаас наагуур байсан гишүүд энэ жил 1072 хувьцааны ногдол ашиг “тараах” эрх өвөртлөөд маадгар гэгч нь очих нь. Өөрөөр хэлбэл, өчигдөр УИХ-ын чуулганы хуралдаан хаахаас өмнө Засгийн газраас өргөн мэдүүлсэн "Эрдэнэс-Тавантолгой" компанийн хувьцааны талаар авах арга хэмжээний тухай тогтоолыг төслийг хэлэлцүүлэн баталлаа. Ингэснээр Монгол Улсын иргэн бүр тус компаний 1072 хувьцааг эзэмшихээр болж байгаа юм. Цаашлаад УИХ-ын ээлжит чуулганыг ирэх хоёрдугаар сарын 1-нд хуралдуулж, 1072 хувьцааны ногдол ашиг тараах асуудлыг хэлэлцүүлээр тогтох шиг боллоо. Эх сурвалжийн мэдээлж буйгаар хоёрдугаар сарын 1-нээс өмнө "Эрдэнэс Тавантолгой" ХК-ийн ТУЗ хуралдаж ноогдол ашиг тараах асуудлыг хэлэлцүүлнэ. Улмаар Засгийн газраас Баялагийн сангийн тухай хуулийн төслийг Их хуралд өргөн мэдүүлэх юм байна. Ингэснээр 1072 хувьцааны ногдол ашгийг тараах боломжтой болгох талаар ярилцаж байгаа юм байна. 1072 хувьцааны ногдол ашиг тараах асуудлаар "Эрдэнэс Тавантолгой" ХК-ийн БЭТ Ж.Ганбат "Тогтоолын төсөл баталсантай холбоотой холбогдох өөрчлөлт, тооцоо судалгааг хийнэ. Үүний дараа ТУЗ-дөө танилцуулаад хувьцаа эзэмшигчээ танилцуулна. 2022 онд "Эрдэнэс Тавантолгой" ХК 1.3 их наяд төгрөгийн ашигтай ажилласан. 2022 оны ашгийг хувьцаа эзэмшигч нарт өгөөгүй байгаа. Үүнийг шийдвэрлэнэ. 2023 онд жилийн эцсийн байдлаар гурван их наядын ашигтай ажилласан. Үүний санхүүгийн тайлан хоёр сард гарч, аудит орож баталгаажуулсны дараа 2024 оны дөрөвдүгээр сард ногдол ашгийн тоо эцэслэн гарна. "Эрдэнэс Тавантолгой" ХК-ийн 27.5 хувийг иргэд эзэмшиж байгаа юм. 2022 оны жилийн эцсийн ашгийг тухайн үед хувьцаа эзэмшиж байсан иргэдэд өгөх юм уу, эсвэл нийт иргэдэд өгөх үү гэдгээ компани шийдэж, ТУЗ дээрээ хуралдаж шийдэх юм. Тэгэхээр 1.3 их наядаас 116 мянга гаруй төгрөг тооцохоор байна. 2022 оны ашгийг Сар шинийн өмнө олгох асуудлыг ярина. Гэхдээ ТУЗ дээрээ үүнийг ярих юм" гэлээ.

     Ул боов ууттай, чихрээр хэдэн өндөр настнуудаа хуурдаг, ажил хийсэн мэтээр уртаас урт тайландаа үүнийг тусгадаг, хөгшин настайчуудаасаа санал горилдог ийм улстөрчдөөс улс орны хөгжил цэцэглэлт, бодлого төлөвлөлт горьдоод, хүлээгээд хэрэггүй гэдгийг сануулах нь зүйтэй биз ээ.

       Уг нь өдийд настайчуудынхаа саналыг авсан улстөрчид ул боов тараахын оронд улс орныхоо хөгжил, иргэдийнхээ амьдрах орчныг нь сайжруулах ийм хуулийн төсөл санаачлаад, улс орныхоо төлөө хийсэн ажлын тань хариуд ийм тэтгэвэр тогтоох хууль боловсруулсан шүү гээд бодлого, төлөвлөлт яриад сууж байх байлаа. Гэвч одоогийн улстөрчдөөс манлайлал үзүүлэх гишүүн байхгүй гэдгийн баталгаа энэ байна даа.