• Өнөөдөр 2022-09-29

БЯЦХАН БИЛЛЪЯРДЧИН Б.УУГАНБАТ: Би дэлхийн аваргын тэмцээнд заавал амжилт гаргана

2022-09-25,   148

        Эрэгтэйчүүдийн 313 дахь удаагийн “Шайн пүүл опен” тэмцээний насанд хүрэгчдийн ангилалд 10 настай Б.Ууганбат хүү оролцож, гуравдугаар байр эзэлсэн нь цахим орчинд шуугиан тариад байгаа билээ. Тиймээс бид энэ удаагийн “Гэрэлт ирээдүй” буландаа түүнийг урьж, ярилцлаа. Бяцхан биедээ баймгүй хэрсүү тамирчин томчуудтай ана мана өрсөлдөж, тэмцээний шагналт байрт шалгараад тунчиг маадгар сууна. 

       Бид ярилцахаар тохироод гэрийн гадаа явж очлоо. Тэднийх Яармагт байх бөгөөд бяцхан тамирчин Б.Ууганбат маань үсээ толийтол самначихсан, цэмбийтэл хослол өмсчихсөн гэрээсээ гүйн гарч ирсэн юм. Бид мэнд усаа мэндэлцээд Б.Ууганбатын бэлтгэлийнх нь заал руу явлаа. Яармагаас хотын төв рүү орж ирнэ гэдэг хүн бүхний шүдний өвчин болсон гэхэд хилсдэхгүй. Учир нь өглөөнөөс, шөнийн 23 цаг хүртэл автозамын түгжрэл энэхүү хэсэгт бий болдог. Харин энэ бүхнийг үл тоон бяцхан тамирчин Б.Ууганбат  маань Яармагаас гурав, дөрөвдүгээр хороололд ирж өдрийн хоёр бэлтгэл хийдэг байна. Бид хэсэг хугацааны дараа бэлтгэл хийдэг зааланд нь ирлээ. Бэлтгэлийн зааланд буй хүмүүс “Ууганаа минь чи өнөөдөр ирэхгүй гээгүй билүү. Нэг өдөр гэртээ сайхан амрахгүй дээ” гэнэ. Харин манай бяцхан тамирчин “Ярилцлага өгөх байна” хэмээн пээдгэр алхана. Бусад нь “Аая, мундаг юм аа” хэмээн дуу нэгтэй хэлж байлаа. энэ хүрээд бидний яриа албан ёсоор эхэлсэн юм.

-Сайн байна уу. Юуны түрүүнд пүүл биллъярдын эрэгтэйчүүдийн 313 дахь удаагийн “Шайн пүүл опен” тэмцээнд амжилттай оролцож, гуравдугаар байрт шалгарсанд баяр хүргэе. Цахим орчинд чиний талаар олон хүн сэтгэгдлээ бичиж, чиний талаар мэдэхийг хүсэж байх шиг байна. Манай уншигчдад өөрийгөө танилцуулаач?

              -Баярлалаа. Намайг Батхүүгийн Ууганбат гэдэг. Одоо 10 настай. Биллъярдаар хичээллээд хоёр жил болж байна. Би Яармагийн 41 дүгээр сургуулийн тавдугаар ангид суралцдаг. 

-Энэ жилийн хувьд ямар, ямар тэмцээнд оролцож амжилт гаргасан бэ?

             -Энэ жил хэд хэдэн тэмцээнд оролцож, нэг мөнгө, хоёр хүрэл медаль авсан. Хоёр жилийн өмнө анх суралцаж байхдаа биллъярдын шаариг цохиж чаддаггүй байлаа. Аав минь намайг дэмжиж, зөндөө их юм зааж өгсөн. Ер нь манай гэр бүлийнхэн биллъярд их тоглодог. 

-Аав нь биллъярд тоглохыг зааж өгсөн юм байна шүү дээ. Тэмцээнд III байр эзлэхэд аав нь чамд урмын үг хэлсэн үү?

            -Аав намайг “Сайн байна. Хүүгээрээ бахархаж байна” гээд дух, хацар дээр үнссэн. Ээж бас яг аавтай адилхан үг хэлж, үнссэн. Манай аав олон тэмцээнд оролцож, алт, мөнгөн медаль хүртсэн. Өндөр чансаатай мундаг тамирчин. Би ааваараа маш бахардаг.   

Дэлхийн аваргын тэмцээнд заавал амжилт гаргана гэж бодож байгаа.  Биллъярд тоглоход хамгийн гол нь цохихдоо байрлалаа зөв авах хэрэгтэй байдаг

-“Шайн пүүл опен” тэмцээнд оролцсон тамирчдаас хамгийн бага нь буюу 12 настай байсан шүү дээ. Тиймээс туршлагатай, насаар ах тамирчидтай тоглохоос хэр айж, сандарч байв?

           -Намайг цахим орчинд намайг 12 настай гээд биччихсэн байна лээ. Би уг нь 10 настай. 2012 онд аав, ээжийнхээ том хүү болж мэндэлсэн. Үүнээс гадна одоо цуврал тэмцээнүүд болно. Мөн арванхоёрдугаар сард дэлхийн аваргын тэмцээнд оролцоно. Дэлхийн аваргын тэмцээнд заавал амжилт гаргана гэж бодож байгаа.  Биллъярд тоглоход хамгийн гол нь цохихдоо байрлалаа зөв авах хэрэгтэй байдаг. Нэг, хоёр, гуравдугаар зогсолтоо хийгээд явах юм бол ер нь амжилтад хүрнэ гэсэн ойлголттой тоглож байгаа. Тууштай хөдөлмөр, хоёргүй сэтгэлийн үр дүнд заавал амжилт гардаг гэж би хувьдаа боддог. 

-Өдөрт хэдэн цагийг бэлтгэлдээ зориулж байгаа вэ?

             -Ерөнхийдөө бол гурваас таван цагийг зориулж байгаа. Ихэвчлэн өглөө, оройдоо бэлтгэл хийдэг. Зарим үед хичээлээс хамаараад бэлтгэлийн цаг хэлбэлзэх нь бий. Манай үеийн хүүхдүүд хамт бэлтгэл хийдэг. Гэхдээ би бэлтгэлдээ ихэнхдээ ах нартай тоглодог. Яагаад гэхээр олон жил тоглочихсон хүнээс туршлага хуримтлуулах гээд олон зүйлийг өөртөө суулгаж авна шүү дээ.

-Цаашдаа биллъярдаараа амжилт гаргасан мундаг тамирчин болно гэж боддог уу. Эсвэл хичээл, сурлагаараа амжилт гаргаж, эрдэмтэй хүн болно гэж боддог уу?

             -Ер нь бол биллъярдаараа л амжилт гаргасан сайн тамирчин болно гэж боддог. Би математикийн хичээлдээ сайн. Энэ нь биллъярд тоглоход чухал нөлөө үзүүлдэг. Яагаад гэхээр биллъярд мэдрэмжээс гадна, математикийн ухаан их шаарддаг л даа. Биллъярдаараа тууштай бэлтгэлээ хийвэл амжилт гаргаж чадах юм шиг санагддаг.

-Гуравдугаар байрт шалгарах тоглолтоо хийх үеэрээ хэр их сандарч байв?

           -Би маш их сандарсан. Хамт олон минь дэмжсэн болохоор хожсон байх. Гуравдугаар байрын төлөө Ерөөлт гээд ахтай тоглосон. Би сандрахаараа гүнзгий амьсгаа аваад, дуртай зүйлээ бодож тайвширдаг. Ер нь биллъярдаар хичээллэж байгаа хүн хожигдсон ч гэсэн дахин, дахин оролдож, шантрахгүй байх хэрэгтэй. Олон дахин давтамжтайгаар хичээллэж чадвал амжилт гаргана.

     Жижигхэн биедээ баймааргүй ур чадвартай нэгэн аж. Өөрөөсөө насаар ах, мэргэжлийн тамирчидтай ана мана өрсөлдөж, хор шар, ур чадвар, ур ухаанаа дайчлан гуравдугаар байрын шагнал хүртсэн бяцхан тамирчин Б.Ууганбаяр. Тэрбээр өдгөө 10 настай бөгөөд өөрийг нь цахим ертөнцөд 12 настай хэмээн бичсэн байсанд жаахан гомдож байгаа гэсэн. Мөн цаашдаа мэргэжлийн өдөр түвшинд бэлтгэлээ хийж, Дэлхийн аваргын тэмцээнд оролцох тухайгаа ярьж байлаа. Үүнээс гадна дэлхийд монголынхоо тугийг мандуулсан сайн тамирчин болох хоёргүй сэтгэлтэй гэсэн. Бяцхан тамирчны маань хүсэл мөрөөдөл цаг үргэж биелж, амжилтууд ар араас цуварч байх болтугай.


БЯЦХАН БИЛЛЪЯРДЧИН Б.УУГАНБАТ: Би дэлхийн аваргын тэмцээнд заавал амжилт гаргана
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188