Хүн бүр өөр өөрийн гэрэлтэй. Гагцхүү хэн өөрийн гэрлээ улам нэмж, түүгээрээ бусдыг гэрэлтүүлэх вэ гэдэг нь хувь хүнээс хамаарна гэж энэ удаагийн "Түүчээ" булангийн маань зочин ярьсан юм. Тэр бол "Гэрлээ нэм" сайн дурын бүлгэмийн тэргүүн Д.Нямсүрэн. Тэрбээр нийгэмд өөрийн дуу хоолойг өргөж, бусдад туслахаар тус бүлгэмийг нээсэн гэнэ. Ингээд түүний бусад руу гэрэл зөөж яваа үйлсийнх нь талаар ийн ярилцлаа.

-Сайн байна уу. "Гэрлээ нэм" бүлгэмээ байгуулах болсон түүхээс яриагаа эхэлье?

 -Манай бүлгэм бол Чингэлтэй дүүрэгт сайн дурын үйл ажиллагаа явуулдаг хүүхэд залуусын нэгдэл. Чин сэтгэлээсээ бусдад туслах хүсэлтэй, бусдын гэрлийг нэмэхийг хүсдэг хүүхдүүд нэгдэж, өөрсдийн санаа санаачилгаараа үйл ажиллагаа явуулдаг. Одоогоор нийт есөн гишүүний бүрэлдэхүүнтэй. Насны хувьд хамгийн дээд талдаа тавдугаар сургуулийн нийгмийн ажилтан, доод талдаа ХII ангийн сурагч бий. Бид цөм бусдад тусална гэсэн сэтгэлээр нэг цэгт уулзаж, бүлгэмээ байгуулсан. Хамгийн гол нь хүмүүс бүлгэм гэхээр ажилгүй хүмүүс гэж ойлгодог. Энэ буруу ойлголт. Бид чинь хичээл, ажлынхаа хажуугаар бүлгэмийнхээ үйл ажиллагааг явуулж бусдад тусалдаг.

Бид цөм бусдад тусална гэсэн сэтгэлээр нэг цэгт уулзаж, бүлгэмээ байгуулсан

 -Бүлгэм нь хаана байрладаг вэ. Хаанаас хэрхэн санхүүждэг вэ?

 - Манай бүлгэм Чингэлтэй дүүргийн Хүүхэд, залуучуудын хэлтэст байрлан, үйл ажиллагаагаа явуулдаг. Санхүүжилт гэж зүйл байхгүй. Бид өөрсдийн санаачилгаар хандивын аян өрнүүлж, түүгээрээ бусдад тусалдаг. Монгол Улсын Боловсролын Их сургуулийн скаут болон Улаан загалмайн нийгэмлэг, төрийн бус байгууллагаас бидний үйл ажиллагаанд тусалж, хандивын аяныг маань дэмждэг. Бидний ажил сэтгэл дээр тулгуурлан явагддаг. Хийнэ, тусална гэсэн сэтгэл байхад болохгүй зүйл гэж байдаггүй. Болохгүй, бүтэхгүй гэсэн бол анхнаасаа эхлүүлэхгүй, бид нэгдэхгүй байх байсан.

-Одоогоор ямар ямар хандивын аян өрнүүлж, үйл ажиллагаа зохион байгуулсан байна вэ?

 -Олон бий. Бид аль болох багаас их рүү гэдэг зарчмыг баримталдаг. Мөн ихэвчлэн Чингэлтэй дүүргийнхээ зорилтот бүлгийн хүүхдүүд рүү чиглэсэн зүйлийг их хийхийг боддог. Хүмүүс өөрт хэрэггүй гээд бусдад хэрэг болох зүйлсийг хаях нь элбэг. Тухайлбал, өнөөдөр гэр хороололд хувцасгүй, хичээлдээ явах цүнхгүй хүүхэд олон. Тийм л хүүхдүүдэд тусалж, гэрэл асааж өгөхийг боддог. Бид намар хичээл эхлэхэд хүүхдүүдэд хандиваар хичээлийн хэрэгсэл цуглуулан бэлэглэсэн. Энэ мэтээр тэдэнд хэрэгтэй зүйлсийг нь өгөхийг хичээдэг. Мэдээж дүүргийнхээ бүх хүүхдүүдэд хүрч ажиллаж чаддаггүй. Аль болох өөрсдийнхөө хэмжээнд хүүхдүүдэд туслахыг зорьдог.

-Мэдээж баярлуулах хүүхдүүдээ олох нь чухал байх. Энэ хүрээнд хорооны хэсгийн ахлагч нартай хамтарч ажилладаг байх?

-Хэсгийн ахлагч нартай хамтарч ажиллана. Бид мөн айл, өрхүүдийн амьжиргааны судалгаан дээр үндэслэн хаана, аль хорооны айл, өрхийн хүүхдүүдэд туслах вэ гэдгээ сонгодог. Одоо бид шинэ жилтэй холбоотойгоор эвент зохион байгуулахаар ажиллаж байна. Насан туршийн боловсролд хамрагддаг хүүхдүүд болон зорилтот бүлгийн хөгжлийн бэрхшээлтэй хийт 100 гаруй хүүхдүүдийг баярлуулж, шинэ жилийн бэлэг гардуулах юм. Мөн зорилтот бүлгийн 500 хүүхдэд ном хандивлахаар бэлдсэн байгаа.

-Хандивын аянаа хэрхэн өрнүүлдэг вэ. Хүмүүс хэр идэвхтэй оролцож байна вэ?

 Бид "Гэрлээ нэм" пэйж хуудсаар дамжуулан мэдээлэл түгээдэг. Мөн бусад бүлэг, төрийн бус байгууллагаас бэлэг ирнэ. Хувь хүмүүс зарын дагуу сэтгэлээрээ хандив өгдөг. Тухайлбал, ном гэхэд өөрсдөө холбогдоод аваад ирнэ. Одоо шинэ жилийн баярын бэлгийг гэхэд МУБИС-ийн скаут бүлгэм болон Улаан загалмайн нийгэмлэгээс өгсөн гэх зэргээр дэмжин, хамтрах газрууд их бий.

-"Гэрлээ нэм" нэрийг яагаад өгөх болсон бэ

-Хүмүүсийг нийгэмд гэрлээ нэмээсэй гэж хүсдэг. Хүн бүр гэрэлтэй. Гагцхүү өөрийн гэрлээ хэрхэн нэмж асаах нь хувь хүнээс шалтгаалдаг. Өөрийн гэрлээ бусад руу асааж, бусдад халуун сэтгэлэар туслах гэдэг үүднээс энэ нэрийг өгсөн. Хүнд тусална гэдэг хамгийн сайхан. Тэгээд бидний тусад баярлаж байгааг харах хамгийн гоё. 

-Цаашид олон зорилт, төлөвлөгөөг гаргасан байх?

-Тийм ээ. Мэдээж бүлгэмийнхээ цар хүрээг улам нэмж, илүү цаашид илүү олон хүнд гэрэл нэмнэ.