Монгол Улсын Ерөнхий сайд Г.Занданшатар 2026 оны хоёрдугаар сарын 13-ны өдөр Засгийн газрын сайд нарын хамтаар Дархан-Уул аймгийн Дархан хотын “ДДЦС” ТӨХК-д ажиллалаа.

    Дархан дулааны цахилгаан станц нь 83 МВт хүчин чадалтай, нийтдээ есөн зуух ажиллуулж байна. 1965 онд ашиглалтад орсон тус станцын турбин генераторуудыг шинэчлэх шаардлагатай болсон. 120 мянга цаг ажиллуулах ёстой турбин генераторууд одоогоор 288-359 мянган цаг буюу ашиглалтын хугацаа гурав дахин хэтэрчээ.

    2025 онд 3898 хүн Дархан-Уул аймагт шилжин иржээ. Мөн жилд дунджаар 1300 айлын орон сууц ашиглалтад орж байна. 2021 оноос хойш төсвийн орлого нь гурав дахин нэмэгдэж, Дархан-Уул аймгийн эдийн засаг гурван жилийн хугацаанд хоёр дахин тэлсэн байна.

     Тиймээс цахилгаан дулааны шинэ эх үүсвэр шаардлагатай байгаа тул төр хувийн хэвшлийн түншлэлээр төсөл хэрэгжүүлэх саналыг аймгийн удирдлагууд тавилаа. Шинээр хоёр дахь эх үүсвэр барих ажлын судалгаа, тооцооллыг шуурхайлж, цэгцлэхийг Ерөнхий сайд энэ үеэр үүрэг болгон онцоллоо.