Нийслэлийн МАН-ын хорооны хурал болж байна.

          Энэ үеэр Хотын дарга асан Х.Нямбаатар "Намын удирдах зөвлөлөөс нэр ирүүлсэн. Б.Пүрэвдагвыг Нийслэлийн Засаг дарга буюу Улаанбаатар хотын захирагчаар томилох саналыг Нийслэлийн иргэдийн төлөөлөгчдийн хурал дахь МАН-ын бүлэгт хүргүүлэх эсэх асуудлаар санал хураагаад, өнөөдрийн хурал өндөрлөхөөр төлөвлөж байгаа. Б.Пүрэвдагва манай МАН-д бэлтгэгдсэн залуу. Цаашид хотын даргын ажлыг хэрхэн хийж гүйцэтгэх нь томилогдоод, батлагдсанаас хойш хотын иргэд өөрсдөө үнэлэх асуудал. Хот тосгоны эрх зүйн байдлын тухай хуулийн дагуу Нийслэлийн Засаг дарга буюу Улаанбаатар хотын захирагч гэдэг албан тушаалыг нэг албан тушаал болгож, шууд хотын иргэд сонгодог эрх зүйн шинэчлэл рүү явах алхмыг бид хийсэн. Харамсалтай нь хууль хойшлоод байна. Бидэнд түгжрэл, агаарын бохирдол гэсэн гол тулгамдсан хоёр асуудал бий. Өнгөрсөн жил агаарын бохирдлыг 30 орчим хувиар, түгжрэлийг 11 хувиар бууруулсан. Энэ жил бид 10 мянган айлыг нэмж газанд холбох ажил гэрээ хийх шатандаа явж байгаа. Дэд бүтэц шийдэх асуудал бий. 2100 орчим уурын зуух, нам даралтын тогоо, 170 орчим уурын зуухыг газ руу шилжүүлж чадвал бид агаарын бохирдлыг дахиад 30 орчим хувиар бууруулах боломжтой. Мөн автомашины шатахууныг евро стандарт руу шилжүүлж чадвал агаарын бохирдол буурна гэх төлөвлөгдсөн ажлуудыг үргэлжлүүлнэ гэж бодож байгаа. Түгжрэлтэй холбоотой асуудал дээр Туулын хурдны зам, тойрог хурдны замын ажлыг цаашид үргэлжлүүлэх байх. Ингэснээр түгжрэл одоо байгаагаас 50 орчим хувиар буурна" гэв.