ОБЕГ-ын Гамшгаас хамгаалах сургалтын газар, Ажиллагааны удирдлагын газраас эрэн хайх, аврах анги, салбар, бүлгийн аврагч-тэсэлгээчин, аврагч алба хаагчдын сургалт, дадлагыг энэ сарын 1-2-ны өдрүүдэд хоёр үе шаттай зохион байгуулжээ.

   Танхимын сургалтыг ОБЕГ-ын харьяа Үндэсний аврах бригадад зохион байгуулж, тэсэрч, дэлбэрэх бодистой холбоотой хууль, дүрэм, журам, заавар, сүүлийн жилүүдэд гарсан осол, түүний сургамж, үйлдвэрийн зориулалттай тэсрэх материалын төрөл, хор аюул, аюулгүй ажиллагаа, хяналтын тогтолцоо зэрэг сэдвээр онолын мэдлэг олгосон байна. Мөн тэсрэх материалыг устгахад тавигдах шаардлага, устгалын үеийн аюулгүй ажиллагааны талаар сургалт зохион байгуулжээ.

   Онолын мэдлэгийг бататгах дадлагыг нийслэлийн Багахангай дүүрэгт байрлах “Мастер майнинг сервис” ХХК, “Кемекс” ХХК-ийн үйлдвэр, агуулахад зохион байгуулж, үйлдвэрлэлийн бодит орчинтой танилцан, туршилтын тэсэлгээний дадлага хийж, харилцан туршлага солилцсон байна.

   Сургалтад төв, орон нутгийн Онцгой байдлын байгууллагын 53 алба хаагч хамрагджээ. Дадлагаар тэсрэх материалтай холбоотой эрсдэлийг зөв үнэлэх, ажиллагааг урьдчилан төлөвлөх, аюулгүй ажиллагааны шаардлагыг чанд мөрдөх, багийн уялдаа холбоог хангах, шуурхай ажиллах ур чадварыг бодит орчинд дадлагажуулсан байна. Тус сургалт, дадлага нь аврагч-тэсэлгээчдийн мэргэжлийн ур чадвар, аюулгүй ажиллагааны зөв дадал, шуурхай ажиллах чадавхыг бэхжүүлж, эрсдэлийг зөв тооцон аюулгүй, үр дүнтэй аврах ажиллагааг зохион байгуулах мэдлэг, дадлыг нэмэгдүүлэхэд чиглэжээ.