“World Cleanup Day” хөдөлгөөнд 10 мянга гаруй залуу нэгдэнэ

   Дэлхийн өнцөг булан бүрт сая сая хүн нэгэн өдөр нэгдэж, эх дэлхийгээ цэвэрлэх, хог хаягдлыг бууруулах, байгаль орчинд ээлтэй зөв хандлагыг түгээн дэлгэрүүлэх зорилготой “World Cleanup Day” хөдөлгөөн Монгол Улсад тав дахь жилдээ, зургаа дахь удаагаа зохион байгуулагдах гэж байна.

   Энэ сарын 19-нд болох тус аяны хүрээнд Монгол Улсын өнцөг булан бүрээс 10 мянга гаруй залуус нэгдэж, эх дэлхийгээ цэвэрлэх үйлсэд хувь нэмрээ оруулахаар бүртгүүлжээ. Энэ талаар аяны санаачлагч Н.Булгантамир мэдээлсэн байна.

   “CleanUP-6” аян нь зөвхөн орчны хог хаягдлыг цэвэрлэхээс гадна иргэд, тэр дундаа залуучуудыг байгальд ээлтэй амьдралын хэв маягт уриалах, нийтийн эзэмшлийн орчинд хариуцлагатай хандах соёлыг түгээн дэлгэрүүлэхэд чиглэж буйгаараа онцлог аж.

Өдөр тутмын амьдралын хэв маягаас үүсэж буй хог хаягдал нь байгаль орчинд тодорхой хэмжээний дарамт учруулдаг. Тиймээс нэг өдрийн цэвэрлэгээгээр хязгаарлах бус, хүн бүр өөрийн амьдарч буй орчиндоо хариуцлагатай хандах нь урт хугацааны эерэг өөрчлөлтийн эхлэл болохыг зохион байгуулагчид онцолж байна.