Цаг уурын байгууллагаас гаргасан ирэх саруудын цаг агаарын ерөнхий төлөвөөр арваннэгдүгээр сард ихэнх нутгаар агаарын температур олон жилийн дунджаас хүйтэн, зарим бүс нутагт хур тунадас ахиу орох төлөвтэй байна.

   Иймд зуны улиралд хуурайшилт, гангийн нөхцөл ажиглагдсан, бэлчээрийн даац муу, хадлан тэжээлийн нөөц багатай нутгийн иргэд, малчдыг малын тэжээлээ нөөцлөх, өвөлжилтийн бэлтгэлээ эртнээс хангахыг цаг уурын байгууллагаас зөвлөлөө.

   Аравдугаар сард Баян-Өлгий, Увс, Ховд, Говь-Алтай, Баянхонгорын өмнөд болон Өмнөговийн баруун хэсгээр агаарын дундаж температур олон жилийн дунджаас дулаан байх төлөвтэй. Харин бусад нутгаар дунджийн орчим байна.

   Энэ сард Ховд, Говь-Алтай, Баянхонгорын өмнөд, Өмнөговийн баруун хэсгээр хур тунадас олон жилийн дунджаас бага, харин Хөвсгөл, Архангай, Булган, Сэлэнгэ, Завханы зүүн, Төвийн ихэнх, Хэнтийн баруун хойд хэсгээр ахиу орох төлөвтэй байна.

   Арваннэгдүгээр сард Булган, Сэлэнгэ, Төв, Хэнтий, Дорнод, Хөвсгөл, Архангайн зүүн, Сүхбаатарын хойд хэсгээр агаарын дундаж температур олон жилийн дунджаас хүйтэн байх бол бусад нутгаар дунджийн орчим байна.

   Мөн Өмнөговь, Дорноговь, Баянхонгор, Дундговь, Сүхбаатарын өмнөд хэсгээр хур тунадас олон жилийн дунджаас ахиу, бусад нутгаар дунджийн орчим орох төлөвтэй байна.

   Харин арванхоёрдугаар сард Баян-Өлгий, Увс, Ховд, Завхан, Хөвсгөл, Архангай, Булган, Говь-Алтай, Баянхонгор, Өвөрхангайн хойд, Сэлэнгэ, Төвийн баруун хэсгээр агаарын дундаж температур олон жилийн дунджаас дулаан байх төлөвтэй байгаа бол бусад нутгаар дунджийн орчим байна.

   Энэ сард Өмнөговь, Дорноговийн ихэнх нутаг болон Баянхонгорын өмнөд хэсгээр хур тунадас олон жилийн дунджаас ахиу, бусад нутгаар дунджийн орчим орох төлөвтэй байна.

Эх сурвалж: УЦАОММ болон ОБЕГ