Цаг уурын байгууллагын урьдчилсан мэдээгээр есдүгээр сард агаарын дундаж температур ихэнх нутгаар олон жилийн дунджийн орчим байх төлөвтэй байна. Харин баруун өмнөд нутгаар дунджаас дулаан, төв болон зүүн аймгийн зарим нутгаар дунджаас сэрүүн байх төлөвтэй аж.

   Хур тунадас баруун өмнөд нутгаар олон жилийн дунджаас бага, харин төв болон зүүн аймгуудад ахиу орох төлөвтэй байна. Өдөртөө харьцангуй дулаан байх боловч шөнөдөө дулаан алдалт эрчимжиж, агаарын температур огцом буурах, уулархаг нутгаар нойтон цас орох, газар тариалангийн бүс нутгаар хяруу унах, хөрсөн дээр цочир хүйтрэх зэрэг үзэгдэл олон жилийн дунджаас эрт ажиглагдаж болзошгүй байна.

   Баруун аймгуудын нутгаар Ховд, Говь-Алтай, Баянхонгорын өмнөд хэсгээр дулаан, бусад нутгаар дунджийн орчим байна. Зарим үед хур тунадас орж, уулархаг нутгаар нойтон цас хаялах, салхи түр зуур ширүүсэх төлөвтэй.

   Төвийн аймгуудаар Сэлэнгэ, Төв аймгийн зүүн хойд хэсгээр дунджаас хүйтэн, хур тунадас ахиу байх төлөвтэй. Нэгдүгээр арав хоногийн ихэнх хугацаанд болон хоёр, гуравдугаар арав хоногийн эхээр хур тунадас орж, уулсаар нойтон цас орох магадлалтай.

   Зүүн аймгуудад Хэнтий, Дорнодын хойд хэсгээр дунджаас хүйтэн, хур тунадас Дорнод болон Хэнтий, Сүхбаатарын хойд хэсгээр ахиу орох төлөвтэй. Зарим үед салхи ширүүсэж, шороон шуурга шуурч болзошгүй. Говийн аймгуудаар Өмнөговийн ихэнх нутгаар дунджаас дулаан байх бол хур тунадас Өмнөговийн баруун хэсгээр бага байна. Салхи 5-10 м/с, зарим үед 10-16 м/с хүрч, шороон шуурга шуурах төлөвтэй.

   Иймд малчид хадлан тэжээл, өвөлжилтийн бэлтгэлээ эрт хангах, тариаланчид ургац хураалтыг цаг агаарын нөхцөлтэй уялдуулан шуурхай зохион байгуулж, хяруу, цочир хүйтрэлтээс ургацаа хамгаалахыг ЦУОШГ-аас анхаарууллаа. Иргэд, аж ахуйн нэгж, байгууллагууд богино хугацааны нарийвчилсан мэдээ, сэрэмжлүүлгийг тогтмол авч ашиглахыг зөвлөж байна.

Эх сурвалж: ЦУОШГ