Дорноговь аймгийн өвөлжилтийн бэлтгэл ажил 81.2 хувийн гүйцэтгэлтэй үргэлжилж байгааг танилцууллаа.

   Ерөнхий сайдын 10 дугаар албан даалгаврын хүрээнд хийсэн хяналт шалгалтаар нийт 559 зөрчил илэрснээс 127-г газар дээр нь арилгуулж, үлдсэн 432 зөрчилд хугацаатай үүрэг, чиглэл өгсөн байна. Мөн уул уурхайн үйл ажиллагааны улмаас үүссэн 64 ухсан нүх, шуудууг булж, таван хуулийн этгээдийн үйл ажиллагааг бүрэн зогсоожээ.

   Аймгийн хэмжээнд цаашид шийдвэрлэх шаардлагатай хэд хэдэн асуудлыг танилцуулсан бөгөөд үүнд “Чандмань Илч” ОНӨХХК-ийн үндсэн түүхий эд, материалын санхүүжилтийг шийдвэрлэх, офицерийн 1, 2 дугаар байрны 80 айлын орон сууцны суурийн хүчитгэлийн ажлыг хийх, Сайншанд сумын Дулааны станцын 3 дугаар зуухны өргөтгөл, шинэчлэлийг эрчимжүүлэх, Онцгой байдлын газрын гал унтраах ангийн шинэ барилга барих, газрын тосны бүтээгдэхүүний хадгалалтын нөөц савны хүчин чадлыг нэмэгдүүлэх зэрэг асуудал багтаж байна.

   Мөн Дорноговь аймаг төмөр зам, эрчим хүч зэрэг дэд бүтцийн давуу талаа түшиглэн бүсчилсэн хөгжлийн хүрээнд эдийн засгийн идэвхтэй төв болон хөгжих боломжтойг онцолж, олон жил зогсонги байсан чөлөөт бүсийн үйл ажиллагааг хууль, эрх зүйн хүрээнд дэмжиж, бодитоор хөгжүүлэхээр ажиллахыг мэдээллээ.