Ус цаг уур, орчны судалгаа, мэдээллийн хүрээлэнгийн Хөдөө аж ахуйн цаг уурын судалгааны хэлтсээс мэдээлснээр, долоодугаар сарын 31-ний байдлаар бэлчээрийн ургамлын ургалтын байдал нийт нутгийн 55 хувьд сайн, 40 хувьд дунд, 5 хувьд муу үнэлгээтэй байна.

   Тодруулбал, Баянхонгор, Өвөрхангай, Дундговь аймгийн цөөн сум, мөн Ховд, Завхан, Говь-Алтай, Дорноговь, Өмнөговь аймгийн ганц нэг сумын нутагт бэлчээрийн ургамлын ургалт муу байгаа аж. Харин Орхон, Сэлэнгэ, Дархан-Уул, Төв, Говьсүмбэр, Дорнод аймгийн нийт нутаг, Увс, Говь-Алтай, Завхан, Архангай, Хөвсгөл, Сүхбаатар аймгийн ихэнх, Баян-Өлгий, Ховд, Булган, Хэнтий аймгийн зарим, мөн Баянхонгор, Дорноговь, Өвөрхангай, Дундговь аймгийн цөөн сумын нутгаар ургалт сайн байгаа бол бусад нутгаар дунд зэрэг түвшинд байна.

   Мөн долоодугаар сарын 25-ны өдрийн байдлаар бэлчээрийн ургамлын ургац төвийн болон зүүн бүсийн зарим суманд нэг га-аас 4.1-16.9 центнер, тал хээр болон говийн бүсэд 0.1-4.0 центнер хэмжигджээ. Өмнөх оны мөн үеийн үзүүлэлттэй харьцуулахад Төв аймгийн ихэнх нутаг, Сэлэнгэ, Дархан-Уулын зарим хэсэгт ургац нэмэгдсэн бол Архангайн зарим суманд буурсан, харин бусад нутгаар өнгөрсөн жилийнхтэй ойролцоо түвшинд байгаа юм.