Эрүүл мэндийн яам Анагаахын Шинжлэх Ухааны Үндэсний Их Сургууль, НҮБ-ын Хүүхдийн Сан болон мэргэжлийн нийгэмлэгүүдтэй хамтран “Helicobacter pylori ба ходоодны хорт хавдрын урьдчилан сэргийлэлт” сэдэвт олон улсын симпозиумыг зохион байгуулжээ.

    Симпозиумд нийслэл, орон нутгийн 36 эрүүл мэндийн байгууллагын 98 эмч, мэргэжилтэн, судлаач оролцож, H. pylori-ийн халдварыг эрт илрүүлэх, эмчлэх, антибиотикт тэсвэржилтийг бууруулах, хүүхэд болон өрхийн хүрээнд халдвар дамжих нөхцөл, ходоодны хорт хавдрыг эрт илрүүлэх асуудлыг олон улсын болон үндэсний судалгаа, эмнэлзүйн туршлагад тулгуурлан хэлэлцсэн байна. Япон Улсын Оита их сургуулийн профессор Ёшио Ямаока, ДЭМБ-ын Олон улсын хавдар судлалын агентлагийн судлаач Жин Ён Пак болон Монголын эмч, судлаачид H. pylori-ийн халдвар, оношилгоо, эмчилгээ, ходоодны хорт хавдраас урьдчилан сэргийлэх чиглэлээр илтгэл танилцуулсан байна.

  Симпозиумын үр дүнд H. pylori-ийн халдварыг эрт илрүүлж, эмчлэх пилот хөтөлбөр хэрэгжүүлэх, халдварын хяналтыг ходоодны хорт хавдрын эрт илрүүлэгтэй уялдуулах, антибиотикт тэсвэржилтийг оношлох чадавхыг сайжруулах, үндэсний мэдээллийн санг хөгжүүлэх чиглэлээр санал нэгджээ.