ОХУ-ын Эрхүү хотод есдүгээр сарын 10-12-ны өдрүүдэд “Зоонозын халдварын тулгамдсан асуудлууд” сэдэвт олон улсын эрдэм шинжилгээ, онол-практикийн XI бага хурал зохион байгуулагджээ.

   Тус хурлыг ОХУ-ын Шинжлэх ухаан, дээд боловсролын яам, Оросын Шинжлэх ухааны академийн холбогдох байгууллагын удирдлага дор Эрхүү хотын Тарваган тахал судлалын эрдэм шинжилгээний хүрээлэн, Монгол Улсын Эрүүл мэндийн яамны харьяа Зоонозын өвчин судлалын үндэсний төв (ЗӨСҮТ), Халдварт өвчин судлалын үндэсний төв, АШУҮИС-ийн Монгол анагаах ухааны сургууль хамтран зохион байгуулжээ.

   Хурлын нээлтийн үеэр Орос, Монголын холбогдох байгууллагын удирдлага, төлөөлөгчид үг хэлж, мэндчилгээ дэвшүүлсэн байна. Салбар хуралдаанаар дамжуулагчаар дамжих халдвар, зоонозын халдварын тархвар зүй, молекул биологийн оношилгоо, урьдчилан сэргийлэлтийн орчин үеийн асуудлыг хэлэлцжээ. ЗӨСҮТ-ийн судалгааны баг өөрсдийн хийсэн судалгааны ажлын үр дүнг аман болон ханын илтгэлээр танилцуулж, эрдэмтэн, судлаачидтай санал, туршлага солилцсон байна.

   Мөн хурлын үеэр талууд хамтын ажиллагааг үргэлжлүүлэх, хамтарсан тандалт, судалгаа хийх, эрдэм шинжилгээний бүтээл туурвих, цаашид хамтарсан хурал зохион байгуулах чиглэлээр санал солилцжээ. Тус хуралд оролцсоноор хил дамнасан зоонозын халдварт өвчний хариу арга хэмжээ, оношилгоо, тандалт судалгааны чиглэлээр ОХУ болон бусад орны эрдэмтэн, судлаачидтай хамтын ажиллагааг өргөжүүлэх боломж бүрдсэн байна.