Монгол Улсын Ерөнхий сайдын дэвшүүлсэн “Чөлөөлье” санаачилгын хүрээнд Засгийн газрын хуралдаанаар Эрүүл мэндийн сайд Э.Батшугарын танилцуулсан “Эм, эмнэлгийн хэрэглэгдэхүүн, биобэлдмэл, вакциныг нэг эх үүсвэрээс худалдан авах журам”-ыг шинэчлэн баталлаа.

   Шинэчилсэн журам нь Эм, эмнэлгийн хэрэгслийн тухай хуулийн шинэчилсэн найруулгад нийцүүлэн боловсруулагдсан бөгөөд эм, эмнэлгийн хэрэглэгдэхүүний чанар, аюулгүй байдал, ил тод байдал, санхүүгийн үр ашгийг нэмэгдүүлэх, хяналт, хариуцлагын тогтолцоог боловсронгуй болгоход чиглэжээ.

   Журмын хүрээнд Дэлхийн эрүүл мэндийн байгууллагын урьдчилсан баталгаажилт, үйлдвэрлэлийн зохистой дадал (GMP), ISO 9001, ISO 13485 зэрэг олон улсын стандартыг хангасан үйлдвэрлэгчдийн бүтээгдэхүүнийг худалдан авах эрх зүйн үндсийг бүрдүүлсэн байна. Мөн эрүүл мэндийн байгууллагуудын хэрэгцээнд үндэслэн эмийн худалдан авалтыг төвлөрсөн байдлаар төлөвлөж, хамгийн бага үнийн саналд тулгуурлан сонгон шалгаруулах, гэрээг гурван хүртэл жилийн хугацаатай байгуулах, тээвэрлэлт, хадгалалтыг тусгай зөвшөөрөлтэй байгууллагаар гүйцэтгүүлэхээр зохицуулжээ.

   Түүнчлэн өмнөх журамд байгаагүй “Хариуцлага” бүлгийг шинээр тусгаж, худалдан авах ажиллагаатай холбоотой мэдээлэл, тайланг хугацаанд нь ирүүлээгүй, зөрчил гаргасан албан тушаалтанд хуульд заасан хариуцлага тооцох эрх зүйн зохицуулалтыг бий болгосон байна. Журмын холбогдох зохицуулалтыг 2027 оны нэгдүгээр сарын 1-нээс мөрдөхөөр тусгажээ.

   Эрүүл мэндийн сайд Э.Батшугар энэхүү шинэчлэл нь төсвийн хөрөнгийн үр ашигтай зарцуулалтыг нэмэгдүүлэхийн зэрэгцээ иргэдийг олон улсын чанарын шаардлага хангасан, аюулгүй эм, эмнэлгийн хэрэглэгдэхүүнээр тогтвортой хангах эрх зүйн үндсийг бэхжүүлнэ гэдгийг онцолсон байна.