Смарт хумс хийлгэх, гелэн будгаар будуулах эмэгтэйчүүдийн тоо жилээс жилд өсөж байна. Будах, эс будах нь тэдний эрх. Гэхдээ хямдыг нь харж чанаргүй, хямд будгаар будуулах. Хумсаа амраахгүйгээр олон сар будагтай явсан төлбөрөө эрүүл мэндээрээ төлж буй нь харамсалтай. Сүүлийн жилүүдийн улсын болон хувийн эмнэлгүүдийн арьсны кабинетын ачаалал 20-30%-иар нэмэгдсэн гэх тоо баримт бий. Үүний дийлэнх хувийг хумсны хавдрын тохиолдол эзэлж байна.

Бид энэ талаар мэргэжилтнүүдийн байр суурийг хүргэж байна.

ХАВДАР СУДЛАЛЫН ҮНДЭСНИЙ ТӨВИЙН ЕРӨНХИЙ МЭС ЗАСЛЫН ЭМЧ Э.ЭРХЭМБАЯР: ХУМСНЫ ХАВДАР ТОГТМОЛ БУДУУЛЖ, ЛЕД ГЭРЛЭЭР ХАТААДАГ ХҮМҮҮСТ ЗОНХИЛОН ТОХИОЛДДОГ

       -Хумсны толионы хавдар гэж нэрлэдэг. Нийт хавдрын нэг хувийг эзэлдэг. Ховор тохиолдолдог хавдар гэж явдаг. Ажил мэргэжлийн онцлогоос хамаарч хавдар үүсэх магадлалтай.  Зарим тохиолдолд санамсаргүй бэртээх, үүнийгээ удаан эмчлүүлэхгүй үрэвсэлтэй болгосон тохиолдолд үүсэж болно. Мөн гелэн болон энгийн хумсны будгаар тогтмол будуулж, лед гэрлээр хатаадаг хүмүүст зонхилон тохиолддог. Химийн найрлагатай бүтээгдэхүүн байнга хэрэглэх. Хумсаа амраахгүй байгаа нь эрсдэл дагуулж байна.  Цөөн тохиолдолд удамшлаас үүсдэг. Цаашлаад хортой хавдар болох магадлалтай. Манай эмнэлэгт цөөн тоогоор бүртгэгдсэн. Харин арьсны хавдар жил ирэх тусам эрс нэмэгдэж байна.

“ДОКТОР ҮҮР” ГАР САРВУУНЫ ЭМНЭЛГИЙН МЭС ЗАСЛЫН ИХ ЭМЧ, АУ-НЫ ДОКТОР О.ОЧИРПҮРЭВ: ХУМСНЫ ХАВДРЫГ ЗӨВХӨН МЭС ЗАСЛААР ЭМЧЛЭХ БОЛОМЖТОЙ

       Сүүлийн жилүүдэд хумсны хавдрын тоогоо алдчихсан. Угтаа 10000 хүнд нэг тохиолдох өвчлөл учраас эхэндээ тоолж болдог байлаа. Ихэнхдээ чанаргүй химийн бодис, гелэн будаг, uv гэрлээс болж үүсдэг. Мөн хумсаа цохих, хүнд зүйлээр дарах гэмтлээс шалтгаалан үүснэ. Практикт хумсаа байнга будуулдаг хүмүүст илүүтэй тохиолдож байна. Манай эмнэлэгт хандаж буй хүмүүсийг харахад 3-5 жил, зарим нь 10 жил хумсаа тасралтгүй будуулдаг. Үүнээсээ шалтгаалж хумсны хавдартай болсон байна.  Хүмүүс хумсны хавдрын талаар төдийлөн мэдээлэлгүй байдаг.

        Эхний хоёр жилд ямар нэгэн шинж тэмдэг, зовуурь илэрдэггүй. Харагдах байдлын хувьд ч өөрчлөгдсөн зүйлгүй байдаг. Харин олон жил дараа хумсныхаа хэвтэшийг идээд эхэлдэг. Эхний 3-4 жилдээ бол эд зүйлд хүрэхээр өвдөнө. Өөрт маш их зовиур мэдрэгддэг. Манай эмнэлэгт "Хөлдүү маханд хүрэхээр өвдлөө. Гол таслах гэж байгаа юм шиг өвдөөд байна" гэсэн эмэгтэйчүүд их орж ирдэг. Гаднаа тодрох шинж тэмдэггүй учраас эмэгтэйчүүдэд тоолгүй явсаар хүндрүүлдэг. Тиймээс дээрх шиг өвдөлт мэдэрч байвал мэргэжлийн эмч эмнэлэгт хандаж оношлуулах хэрэгтэй. Хумсны хавдарт ямар нэгэн эмийн эмчилгээ байхгүй. Зөвхөн мэс заслаар эдгэрэх боломжтой.

“EVA” САЛОНЫ АРТИСТ Э.ЗОЛЖАРГАЛ: АРИУТГААГҮЙ БАГАЖААР ДАМЖИЖ ЭЛЭГНИЙ В,С ВИРУСААС ЭХЛЭЭД МАШ ОЛОН ТӨРЛИЙН ӨВЧИН ТУСАХ МАГАДЛАЛТАЙ

              -Би артистаар зургаа дахь жилдээ ажиллаж байна. Сүүлийн үед хумсны хавдар гелэн будаг, лед гэрлээс болж үүслээ гэж яригдах болсон. Аливаа зүйлд сайн зүйл бий. Муу ч  тал бий.  Миний хувьд бүтээгдэхүүний чанар, багажны эрүүл ахуйн байдалд маш их анхаардаг.  Байнгын үйлчлүүлэгч нартаа өөрсдийн нь багажыг тусад нь ариутгаад, нэрийг нь бичиж хадгална. Багажаа гурван дамжлагатай ариутгадаг.  Эхлээд шингэнээр цэвэрлэнэ. Тэгээд халуун температурт ариутгана. Сүүлд нь гэрлээр хатаадаг. Ариутгаагүй багажаар дамжиж элэгний в,с вирусаас эхлээд маш олон төрлийн өвчин тусах магадлалтай. Тиймээс ариутгал маш чухал.

“Маникюр хийнэ. Гэрээр очиж будна гэсэн” зар цахим орчинд зөндөө бий. Гадуур гараад алхах юм бол бараг байр болгоны үзүүрт “Маникюр, сормуус, үсчин” гэх самбар байгаа. Үйлчлүүлэгчид маань тэр болгоноос цензуртэй хандаж бүтээгдэхүүн, орчин, туршлага ямар байна гэдгээр нь сонгоосой гэж хүсдэг.  Ихэвчлэн үнэ хямдыг сонгоно. Эсвэл яаралтай үед таарсан салондоо ордог.  Би одоогоор хумсны хавдартай гэх хүнтэй бол таарч байгаагүй. Харин  толио гэмтсэн, хумсны ойролцоох арьс эмзэгшсэн, үрэвссэн хүнийг зөндөө харж байсан. Манайд “Тэнд очоод хумснаас цус гарсан. Толио бүр цаас болчихлоо” гэх хүмүүс орж ирдэг. Би үйлчүүлэгчдээ хумсаа улиралдаа 1-2 удаа амраах. Хумсны тэжээл түрхэх зөвлөгөө өгдөг.

ОЮУТАН Э.М:ГУРВАН ЖИЛ БАРАГ ХУМСАА АМРААХГҮЙ БУДУУЛААД БАЙСАН ЧИНЬ СҮҮЛДЭЭ ХУМСНЫ ТОЛИО МААНЬ НИМГЭРЭЭД ХАЛЬС ШИГ БОЛСОН

       Хааяа хичээлийнхээ хажуугаар цагийн ажил хийдэг. Тэр мөнгөөрөө сардаа нэг удаа смарт хумс хийлгэнэ. Мөн сормуус хийлгэнэ. Оюутан хүний орлого бага зардал их болохоор үнэтэй салонд тэр бүр ороод байж чаддаггүй. Аль хямдыг нь хараад л орно. Оюутан болсон цагаасаа хойш хумс, сормуус хийлгээд дадал болчихсон. Хийлгэхгүй л бол нэг зүйл дутуу юм шиг. Өөртөө итгэлгүй байгаад байдаг. Гурван жил бараг хумсаа амраахгүй будуулаад байсан чинь сүүлдээ хумсны толио маань нимгэрээд хальс шиг болсон. Санамсаргүйгээр хаалга, шатны бариул гэх мэт зүйл хүрэхээр лугшиж өвдөнө. Заа гайгүй байх. Эмнэлэгт үзүүлэх шаардлагагүй хэсэг амраавал зүгээр болох байх гэж сар гаруй явсан. Тэгээд бүр тэсэхээ байсан. Шөнө хүртэл хуруу салж унах гэж байгаа юм шиг өвдсөн. Тэгээд үзүүлэх гэсэн улсын эмнэлэгт цаг олдохгүй. Олдсон цаг нь хичээлийн цагтаа давхцаад байлаа. Тэгээд хувийн эмнэлэгт үзүүлсэн. Тэгсэн чинь миний худлаа байх гэж бодож байсан хумсны хавдар байсан.  Юун нөгөө гоё өнгөөр будуулж, урт хумс хийлгэх. Хумсаа авхуулсан. Одоо гамаа сайн бариад, ахиж будахгүй. Бас ойр дотнын хүмүүстээ сэрэмжүүлж байна гэж бодож байна.

       Калифорниа мужийн их сургуулийн (UCSD) сүүлийн үеийн судалгаагаар Хумс хатаагч төхөөрөмжийг ердөө 20 минут ашиглахад эсийн 20-30% нь үхэж, ДНХ-ийн мутацид орох эрсдэл нэмэгддэг болохыг лабораторийн түвшинд тогтоосон байдаг. Тиймээс чанартай үйлчилгээ сонгож, хумсандаа "амьсгалах" хугацаа заавал гаргаж байгаарай.