Монгол Улсын 330 сум, нийслэлийн хороо бүрээс нэг шилдэг төгсөгчийг шалгаруулан дэлхийн нэр хүндтэй их, дээд сургуульд суралцуулах “Ерөнхийлөгчийн илгээлт-2100” тэтгэлэгт хөтөлбөрийн 2026 оны бэлтгэл хөтөлбөрийн эхний шатанд шалгарсан сурагчдын нэр тодорчээ.

   Боловсролын үнэлгээний төв болон Улсын бүртгэлийн ерөнхий газрын мэдээллийн санд тулгуурлан, холбогдох журмын шалгуурын дагуу сум, хороо бүрээс Элсэлтийн ерөнхий шалгалтын оноогоороо тэргүүлсэн шилдэг төгсөгчдийн жагсаалтыг гаргажээ.Хөндлөнгийн оролцоогүйгээр программын аргаар шүүн гаргасан жагсаалтыг Нийслэлийн боловсролын газар болон аймгуудын Боловсрол, шинжлэх ухааны газраар баталгаажуулж, Боловсролын яамны 01/4831 тоот албан бичгийг үндэслэн нийт 420 хүүхдийн нэрийг зарлаж байна.

   Болзол хангасан хүүхдүүд төрийн өмчийн их сургуулиудын бэлтгэл хөтөлбөрт хамрагдаж, ерөнхий эрдэм болон гадаад хэлний бэлтгэл хийнэ.Бэлтгэл хөтөлбөрөө амжилттай төгссөнөөр сурлагын амжилт болон холбогдох шалгуур, болзлоос хамааран аль улсын, ямар их, дээд сургуульд үргэлжлүүлэн суралцах нь шийдэгдэх юм.Тэтгэлэгт хөтөлбөрт шалгарсан хүүхдүүдтэй бэлтгэл хөтөлбөрийг зохион байгуулах их, дээд сургуулиуд холбогдож, цаашдын үйл ажиллагаатай холбоотой мэдээлэл, зааварчилгаа өгөх аж.