Монгол Улсын Засгийн газрын 2024-2028 оны үйл ажиллагааны хөтөлбөр, “Дэлхийн монголчууд-3” цогц арга хэмжээний хүрээнд Боловсролын яамнаас олгосон санхүүгийн дэмжлэгийг үзүүлэв.  Бүгд Найрамдах Чех Улсад монгол хэл, соёлын сургалтын үйл ажиллагаа явуулж буй Плзен хот дахь “Монголчуудын холбоо” ТББ /Mongolský spolek/, Мост хот дахь “Монголын мэдээлэл, соёлын төв” /Mongolské IK centrum/, Пардубице хот дахь хотод “Mon Week School”, Хавличкув Брод хот дахь “Чех-Монголын Холбоо TББ” /Česko-Mongolský spolek z.s/ гэсэн дөрвөн сургалтын төвд олгож, хамтран ажиллах тухай гэрээ байгуулах үйл ажиллагааг дөрөвдүгээр сарын 24-ний өдөр ЭСЯ-нд зохион байгуулав.

    Элчин сайд Д.Гансүх Чех Улсад эцэг, эхийн хамт аж төрж буй хүүхдүүдэд зориулсан хэл, соёлын болон бусад олон төрлийн сургалт, үйл ажиллагааг өөрсдийн идэвх санаачилгаар амжилттай явуулж буй дээрх сургууль, сургалтын төв, ТББ-уудад талархал илэрхийлж, тэдний үйл ажиллагааг дэмжих, цаашид өргөжүүлэхэд энэхүү санхүүгийн туслалцаа бага боловч тус дэм болно гэдэгт итгэж буйгаа илэрхийлж, эх хэл, түүх, соёлоо эрхэмлэн дээдэлж, зааж сургах үйлсэд нь амжилт хүслээ.

    Энэхүү үйл ажиллагаанд оролцсон ТББ-уудын төлөөлөл тэдний эхлүүлсэн санаачлагыг ийнхүү дэмжиж буй Монгол Улсын Засгийн газарт талархал илэрхийлж, цаашид өөрсдийн үйл ажиллагааг тогтмолжуулж, илүү үр дүнтэй шинэлэг арга барилаар идэвхтэй ажиллахаа онцлов.

    Монгол Улсын Ерөнхийлөгч У.Хүрэлсүхийн Бүгд Найрамдах Чех Улсад 2025 онд хэрэгжүүлсэн төрийн айлчлалын үеэр тус улсад аж төрж буй монгол хүүхэд, залууст эх хэл, түүх, соёл, өв уламжлалыг өвлүүлэх, зааж, сургах үйл ажиллагааг үр дүнтэй зохион байгуулах, тогтмолжуулахад зориулж Монгол Улсын Боловсролын яамнаас санхүүгийн дэмжлэг үзүүлэхээр болсон билээ. Чех Улсад өнөөдрийн байдлаар манай улсын 15 мянга гаруй иргэн албан ёсны зөвшөөрөлтэй оршин суугаагаас 3500 орчим нь 0-14 хүртэлх насны, 600-аад нь 15-18 хүртэлх насны хүүхдүүд байна.