Нийслэлийн Баянгол дүүргийн нутаг дэвсгэр, гуравдугаар хороо, дунд голын зам буюу Энхтайваны гүүр орчимд  21:00 цагийн орчимд зам тээврийн ноцтой осол гарсан. Тодруулбал, том оврын ачааны автомашины жолооч Энхтайваны гүүрний баруун доод талын 3.5 метр өндрийн хязгаарлалтын хаалтыг мөргөсөн билээ. Одоогоор уг ослыг Хан-Уул дүүргийн Замын цагдаагийн хэлтэст шалгаж байна.

Осол гаргасан жолооч согтууруулах ундааны зүйл хэрэглээгүй байсан бөгөөд ослын улмаас бэртэл гэмтэл аваагүй байна. Түүнчлэн өндрийн хязгаарлалтыг анзааралгүй, тооцоолол алдсан гэдгээ тэрбээр хүлээн зөвшөөрчээ. Харин замын байгууламжийг цэвэрлэх, осол гаргасан том оврын ачааны автомашиныг тээвэрлэх ажлыг өчигдөр хийсэн байна.