Хөвсгөл аймгийн Ханх суманд өчигдөр дөрвөн удаа газар хөдөлжээ. Тодруулбал,  тус сумын Хороо багийн Хачим гэдэг газар /сумын төвөөс баруун урд зүгт 37 км-т/ өчигдөр буюу гуравдугаар сарын 31-ний 08:01 цагт 5.7 магнитудын хүчтэй газар хөдлөлт болсон байна. Тус аймгийн Онцгой байдлын газраар дамжуулан тус сумын Засаг даргаас тодруулахад иргэдэд чичирхийлэл хүчтэй мэдрэгдсэн бөгөөд хохирол учраагүй аж.

Мөн Хороо багийн Оёго гэдэг газар /сумын төвөөс урд зүгт 47 км-т/ гуравдугаар сарын 31-ний 08:22 цагт 4.4 магнитудын хүчтэй газар хөдөлсөн байна.  Иргэдэд чичирхийлэл мэдрэгдээгүй бөгөөд хохирол учраагүй.

Мөн тус сумын Хороо багийн Хачим гэдэг газар өчигдөр 14:42 цагт 3.6 магнитудын хүчтэй газар хөдөлсөн. Дөрөв дэх удаа Адуун гэдэг газар /сумын төвөөс баруун урд зүгт 30 км-т/ 15:24 цагт 3.6 магнитудын хүчтэй газар хөдлөлт болсон тухай Одон орон геофизикийн хүрээлэнгээс мэдээлжээ. Газар хөдлөлтийн улмаас иргэдэд чичирхийлэл мэдрэгдэж, хохирол учраагүй аж.