Энэ оны анхны гурван ихэр хүүхэд хоёрдугаар сарын 17 буюу шинийн 6-ны Дашнямтай билэгт сайн өдөр Ховд аймагт мэндэлсэн билээ. Тодруулбал, Ховд аймгийн Алтай сумын харъяат, Жаргалант сумын Бугат багийн 1-17 тоотод амьдардаг Б.Оюунгэрэл хоёр хүү, нэг охин төрүүлсэн. Тэрбээр өдгөө 30 настай.бөгөөд 2012 онд ихэр охин, 2017 онд хүү төрүүлж байсан. Ийнхүү гурван ихэр төрүүлсэнээр зургаан хүүхдийн ээж болсон юм. Гурван ихэрийн аав Б.Отгонпүрэв ихэрүүдэд О.Eрөөлтхүү, О.Ивээлтхүү, О.Хувьзаяа хэмээх нэр хайрласан билээ. Тэгвэл Ховд аймгийн Засаг дарга Б.Дүгэржав болон ИТХ-ын дарга Г.Пүрэвгандий нар өнөөдөр Б.Отгонпүрэвийн гэр бүлд зочилж, гурван өрөө байраар мялаан, “БАТЛАМЖ” гардуулжээ.

Ихрүүдийг Эх барихын ерөнхий мэргэжилтэн Ц.Нарангэрэл, Төрөх тасгийн эрхлэгч Б.Нансалмаа, тэргүүлэх зэргийн эх баригч Д.Наранхүү, Нярайн эмч Ц.Солонго нараар ахлуулсан баг эх барьж авсан бөгөөд эхний хүү өглөө 09:09 цагт 1830 гр, хоёр дахь хүү нь 09:11 цагт 2110 гр, харин охин нь 09:13 цагт 1850 гр төрсөн юм.

Ихэрүүдийн ээж Б.Оюунгэрэл “Гурван ихэртэй болсондоо сэтгэл догдолж, маш их баярлаж байгаа. Манайх Алтай сумын харьяат, хөдөө байдаг. Сар гарантай байхад нь сумын эмнэлэгт очиж үзүүлтэл эмч “Хоёр ихэр бол найдвартай. Хажууд нь жижиг зүйл харагдаад байна. Гурван ихэр байж магадгүй. Аймаг руу очиж сайн үзүүлээд ир” гэсэн. Тэгээд Ховд аймагт ганцаараа ирж үзүүлтэл эмч “Гурван ихэр байна” гэсэн. Тэгээд нөхөртөө утсаар “Гурван ихэр хүүхэдтэй болсон байна гэнэ” гэж хэлэхэд “Чи битгий худлаа яриад бай” гээд огт итгээгүй. Нөхөр маань миний хойноос ирж,  хамт эход харуулаад итгэж байсан. Тэгээд л бөөн баяр болж байсан даа.  Гурван ихэр хүүхдээ олсноос хойш Ховдод нүүж ирсэн. Хоёр сартайгаас нь Ховд аймгийн эмч нарын хяналтад орж, эмчлүүлж байгаад төрлөө” хэмээн ярьсан билээ.

Түүний ярилцлагыг энд дарж уншина уу.