Төрөх дөхсөн эмэгтэйг эмнэлэг рүү явж байхад цагдаагийн алба хаагч зогсоож, торгууль үйлдэн гар хүрсэн гэх мэдээлэл гараад байгаа. Энэ талаар цагдаагийн байгууллагаас мэдээлэл өглөө. ЦЕГ-ын Хэвлэл мэдээллийн төвийн дарга Б.Баатархүү “Жирэмсэн эмэгтэйг төрөх гээд явж байхад нь зам дээр зогсоогоод гар хүрсэн гэх мэдээлэл гарлаа. Үүн дээр бид хяналт шалгалт хийж, тухайн алба хаагчийн энгэрийн камерийн бичлэгийг үзлээ.

Уг бичлэгт 00:00 цагийн үед БГД-ийн нутаг дэвсгэрт зорчиж явсан тээврийн хэрэгслийг цагдаагийн алба хаагч зогсоож, шалгасан юм байна. УОК-ын шийдвэрээр 23:00 цагаас хойш тээврийн хэрэгслийн хөдөлгөөн дээр хяналт тавьж байгаа. Тухайн үед 25 настай И гэх иргэн тээврийн хэрэгсэл жолоодох эрхээ хасуулсан байхдаа автомашин жолоодсон.

Үүнд замын хөдөлгөөний дүрмийн 14-т заасны дагуу арга хэмжээ тооцсон. Журмаараа 200 мянгаар торгож, автомашиныг нь журамлах зохицуулалттай. Тэгэхэд хажууд нь сууж явсан эмэгтэй эсэргүүцэл үзүүлсэн юм билээ. Иймд цагдаагийн алба хаагч жирэмсэн хүнтэй буюу зорчигчтой явж байсныг нь харгалзаж үзээд автомашиныг нь журамлахгүйгээр явуулсан. Тийм атал цагдаа хүн төрөх гээд явж байсан хүнд гар хүрлээ гэх мэдээлэл гарч байна. Тухайн иргэн эмнэлэг рүү бус гэр рүүгээ явж байсан. Мөн алба хаагчийн хэл амаар доромжилж, эсэргүүцэл үзүүлсэн. Цагдаа үүргээ гүйцэтгэж байна. Түүнийг иргэн биелүүлэх ёстой” гэв.