Тоглоом зарж буй иргэнийг цагдаагийн алба хаагч зодсон гэх асуудал олон нийтийн сүлжээгээр цацагдаж, олны шүүмжлэлийг дагуулаад байна. Энэ асуудалд ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүү тайлбар мэдээлэл өглөө. Тэрбээр “Нэг иргэн цагдаа нарт зодуулж, торгуулсан талаарх мэдээлэл гарсан. Тухайн өдөр 13:00 цагийн үед иргэн Э 102 дугаарын утсанд дуудлага өгч, БГД, Өргөө кино театрын орчимд нэг хүн мөрийтэй тоглоом зохион байгуулж, хүмүүсийг залилж байгаа талаар мэдээлэл өгсөн. Уг дуудлагын дагуу тус дүүргийн эргүүлийн цагдаагийн бүрэлдэхүүн газар дээр нь очиход, 1963 онд төрсөн Г гэх иргэн тоглоом тоглуулж байсан. Хуулийн дагуу цагдаагийн хэсэг дээр аваачсан. Тэгэхэд тухайн иргэн бие дасна гэх зэргээр эсэргүүцэл үзүүлж, хэсгийн гадна өөрөө ухаан алдаж унасан юм билээ. Цагдаагийн алба хаагч анхны тусламж үзүүлсэн. Энэ нь камерийн бичлэгт үлдсэн байгаа. Гэтэл тухайн иргэн тоглоомоо тоглуулсаар байх болно, торгуулахгүй гэх зэргээр эсэргүүцэж, НЦУГ-т гомдол гаргасан. Үүнийхээ дараа Сүхбаатарын талбайд өлсгөлөн зарлана гэж очсон. Тэр үедээ мөн л ухаан алдсан юм билээ. Түргэн тусламж ирээд, биеийн байдал зүгээрээ гээд явцгаасан. Энэ хэрэгт цагдаагийн байгууллагаас хяналт шалгалт хийж байна. Иргэн гомдол гаргасан учир мэдээж хуулийн дагуу шалгана. Цагдаагийн алба хаагч хууль дүрэм зөрчигдсөн асуудалд арга хэмжээ тооцож, үүргээ гүйцэтгэнэ” гэлээ.