Монгол Улсад гэмт хэрэг үйлдээд гадаад улс руу оргон зайлсан, олон улсын хэмжээнд эрэн сурвалжлагдаж байсан нийт 37 этгээдийн байршлыг энэ онд тогтоож, Монгол Улсад авчирсан байна.

   Тухайлбал, Бүгд Найрамдах Солонгос Улсын цагдаагийн байгууллагаас 2026 оны наймдугаар сарын 12-ны өдрийн байдлаар гадаад улсад гэмт хэрэг үйлдсэн гэх үндэслэлээр олон улсын хэмжээнд эрэн сурвалжлагдаж буй 110 гадаадын иргэн БНСУ-д оршин сууж байгааг мэдээлжээ. Тэдний 17 нь Монгол Улсын иргэн болохыг тогтоосон байна.

   Монгол Улсын цагдаагийн байгууллагаас Монгол Улсад гэмт хэрэг үйлдээд гадаад улс руу оргон зайлсан этгээдүүдийн байршлыг тогтоох, баривчлуулах, хуульд заасан журмын дагуу Монгол Улсад шилжүүлэн авчрах ажиллагааг Интерполын шугамаар холбогдох байгууллагуудтай хамтран хэрэгжүүлж байна.

   Энэ онд гадаадын улс орнуудад оргон зайлж, олон улсын хэмжээнд эрэн сурвалжлагдаж байсан 37 этгээдийг Монгол Улсад авчирснаас 16 нь БНСУ-аас шилжүүлэн авчирсан байна. Тэдгээр яллагдагчид холбогдох хэргүүдийн мөрдөн шалгах ажиллагаа үргэлжилж байгаа аж.

   Цаашид Интерполын шугамаар эрэн сурвалжлагдаж буй этгээдүүдийн БНСУ дахь байршлыг тогтоох, холбогдох мэдээллийг шуурхай солилцох, баривчлуулах болон Монгол Улсад шилжүүлэн авах ажиллагааг тус улсын Интерполын байгууллагатай хамтран тогтмол хэрэгжүүлэхээр ажиллаж байна.