Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх төрийн цэргийн болон хууль сахиулах байгууллагын залуу офицеруудын төлөөлөлтэй уулзалт зохион байгуулжээ.

   Монгол Улсын Ерөнхийлөгчийн зарлигаар 2026 оныг “Төрийн цэргийн болон хууль сахиулах байгууллагын залуу офицерын жил” болгон зарласан. Энэ хүрээнд залуу офицеруудын мэргэжлийн ур чадвар, манлайлал, шинэ үеийн сэтгэлгээг хөгжүүлэх, нийгмийн хамгааллыг сайжруулах чиглэлээр олон талт арга хэмжээг төлөвлөн хэрэгжүүлж байна.

   Уулзалтын үеэр залуу офицеруудын мэдлэг, ур чадвар, манлайллыг дэмжих, технологийн эрин үеийн шаардлагад нийцсэн шинэ сэтгэлгээг төлөвшүүлэх, алба хаагчдын нийгмийн хамгааллыг сайжруулах талаар санал солилцсон аж. Тус уулзалтад Батлан хамгаалах яам, Хууль зүй, дотоод хэргийн яам, Зэвсэгт хүчний Жанжин штаб, Хил хамгаалах ерөнхий газар, Онцгой байдлын ерөнхий газар, Цагдаагийн ерөнхий газар, Тагнуулын ерөнхий газар болон төрийн цэргийн, хууль сахиулах байгууллагуудын удирдлага, бие бүрэлдэхүүний төлөөлөл оролцлоо. Мөн цагдаа, дотоодын цэргийн байгууллагын 90 залуу офицер оролцож, алба хаагчдын хөгжил, цаашдын зорилт, тулгамдаж буй асуудлын талаар санал бодлоо солилцсон байна.

   Уулзалт нь залуу офицеруудын мэргэжлийн хөгжил, манлайллыг дэмжихийн зэрэгцээ төрийн цэргийн болон хууль сахиулах байгууллагын хүний нөөцийн чадавхыг бэхжүүлэхэд чиглэсэн зорилтот ажлын нэг хэсэг болж байна.