Бүгд Найрамдах Турк Улсын Хамтын ажиллагаа, зохицуулах агентлаг (ТИКА)-ийн дэмжлэгтэйгээр хэрэгжүүлж буй “Олон улсын цагдаагийн мэргэшүүлэх сургалт” төслийн хүрээнд зохион байгуулсан сургалт амжилттай болж өндөрлөжээ.

   Сургалт энэ сарын 7-16-ны өдрүүдэд зохион байгуулагдсан бөгөөд БНТУ-ын Цагдаагийн ерөнхий газрын сургагч багш удирдан явуулжээ. Сургалтад Монгол Улсын цагдаагийн байгууллагын 24 алба хаагч хамрагдаж, сургагч багшаар мэргэшин төгсөж, гэрчилгээгээ гардан авсан байна.

   Тус сургалт нь дипломат төлөөлөгчид айлчлах үеэр гарсан гэмт хэрэг, зөрчлийг шуурхай шийдвэрлэх, хамгаалалтын үйл ажиллагааг зохион байгуулах, болзошгүй эрсдэлээс урьдчилан сэргийлэх чиглэлээр алба хаагчдын мэргэжлийн ур чадварыг дээшлүүлэх ач холбогдолтой юм.

   Сургалтын үйл ажиллагаанд Цагдаа, дотоодын цэргийн Сургалтын нэгдсэн төвийн дарга, цагдаагийн хурандаа Т.Дамбийням, ТИКА-ийн Улаанбаатар дахь хөтөлбөр зохицуулалтын газрын орлогч дарга Өзгүр Юусуф Ыйлдырым нар оролцжээ.