Монгол Улсын Шадар сайд болон Баянхонгор аймгийн Засаг даргатай байгуулсан үр дүнгийн гэрээний хүрээнд Онцгой байдлын ерөнхий газраас “Гамшгаас хамгаалах бэлэн байдлын үзлэг”-ийг энэ сарын 14-18-ны өдрүүдэд Баянхонгор аймагт зохион байгуулжээ.

   Үзлэг, шалгалтад тус аймгийн Баянхонгор, Баянговь, Баян-Овоо, Баян-Өндөр, Баянцагаан, Баянбулаг, Богд, Бөмбөгөр, Хүрээмарал, Заг, Жаргалант, Жинст, Шинэжинст гэсэн 14 сум болон цахилгаан эрчим хүч, эрүүл мэнд, хүнс, хөдөө аж ахуй, мал эмнэлэг, уул уурхай, хүнд үйлдвэрлэл, холбоо, зарлан мэдээлэл дамжуулах чиглэлийн нийт зургаан гамшгаас хамгаалах албыг хамруулжээ.

  Үзлэгээр гамшгаас хамгаалах алба, ерөнхий болон тусгай зориулалтын мэргэжлийн ангийн бүрэлдэхүүний техник, багаж хэрэгслийн бэлтгэл, бэлэн байдал, удирдах бүрэлдэхүүний шийдвэр гаргалт, хариу арга хэмжээний төлөвлөлт, гамшиг, ослын үед ажиллах ур чадвар, холбогдох бодлогын баримт бичгийн хэрэгжилтийг дүгнэсэн байна.

  Мөн мэргэжлийн ангийн бүрэлдэхүүний гамшгаас хамгаалах үйл ажиллагаанд үнэлэлт өгч, цаашид анхаарах асуудлаар мэргэжил, арга зүйн зөвлөгөө өгч ажиллажээ.

  Ажлын хэсгийн ахлагч, ОБЕГ-ын Ажиллагааны удирдлагын газрын дарга, хурандаа А.Дашням үзлэгийн үеэр сумдад гамшгаас хамгаалах эрсдэлийн ерөнхий болон нарийвчилсан үнэлгээ хийх, гамшгаас хамгаалах сургалт, дадлагыг бүх түвшинд эрчимжүүлэх, гамшгаас хамгаалах төлөвлөгөөг бодит нөхцөл байдалд нийцүүлэн боловсруулж, тухай бүр шинэчлэн тодотгох шаардлагатайг танилцуулжээ.