Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх 2026 оныг “Залуу офицеруудын хөгжлийн жил” болгон зарласантай холбогдуулан төрийн цэргийн болон хууль сахиулах байгууллагуудын “Залуу офицеруудын чуулга уулзалт”-ыг өчигдөр буюу есдүгээр сарын 16-нд зохион байгуулжээ.

   Чуулга уулзалтад төв, орон нутгийн Онцгой байдлын байгууллагын 90 гаруй алба хаагч оролцсон байна. Энэ хүрээнд хуулиар хүлээсэн үүргээ нэр төртэй биелүүлж, ажил үйлсээрээ амжилт гарган ажиллаж буй алба хаагчдыг Монгол Улсын Шадар сайдын тушаалаар шагнаж урамшуулжээ.

   Тодруулбал, Онцгой байдлын албаны “Тэргүүний ажилтан” тэмдгээр ОБЕГ-ын Бодлого, төлөвлөлтийн газрын Гадаад хамтын ажиллагаа хариуцсан мэргэжилтэн, ахмад Б.Дөлгөөн, Гамшиг судлалын үндэсний хүрээлэнгийн Галын аюулгүй байдлын лабораторийн цахилгааны инженер-судлаач, ахлах дэслэгч Э.Энхсувд нарыг шагнасан байна.

   Мөн Онцгой байдлын албаны “Онц гал сөнөөгч” тэмдгээр Нийслэлийн Онцгой байдлын газрын Сүхбаатар дүүргийн Онцгой байдлын хэлтсийн Гал түймэр унтраах, аврах 74 дүгээр ангийн захирагч, ахмад Б.Даваа-Эрдэнэ, Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн салааны захирагч, дэслэгч Т.Мягмартөгс нарыг шагнажээ.

Түүнчлэн дээрх алба хаагчдыг гэр бүлийн хамт гадаад улсад аялах эрхийн бичгээр урамшуулсан байна.