Монголын волейболын үндэсний шигшээ багийн тамирчид болох Жаргалцогтын Энх-Эрдэнэ, Мөнхбаярын Уранбаяр, Ганхуягийн Төрмандах нар Балба улсын түүхэн дэх анхны мэргэжлийн волейболын лиг болох "Extreme Energy Drink Nepal Volleyball League (NVL)"-д "Annapurna Spiker Kings" багийн бүрэлдэхүүнд легионероор тоглож, тус лигийн анхны аваргаар тодорчээ.

Тэмцээний гол фаворитуудын тоонд багтаагүй байсан "Annapurna Spiker Kings" баг Монголын тамирчдын гайхалтай тоглолтын ачаар лигийн турш амжилттай тоглож, түүхэн ялалтыг байгуулсан юм.

Гранд Финал: Өрсөлдөгчөө 3-0 харьцаагаар буулгаж авлаа

Аваргын төлөөх шийдвэрлэх тоглолтод "Annapurna Spiker Kings" баг хүчирхэг "Karnali Shivraj" багтай тунаж үлдсэн. Манай тамирчид тоглолтын эхнээс давамгайаллыг гартаа авч, өрсөлдөгчөө 3-0 (25-15, 25-20, 25-18) харьцаагаар буюу цэвэр хожлоор бут ниргэжээ.

Лигийн нээлтийн тоглолтод уг багт хожигдож байсан "Annapurna" ийнхүү хариуцлагатай торгон мөчид дараалсан 5 ялалт байгуулж аварга болсноор Балбын волейболын түүхэн дэх хамгийн өндөр шагнал болох 20 лах рупи (ойролцоогоор 46,960,000 төгрөг)-ийн эзэд болжээ.

Талбай дээрх Монгол "Трио"-гийн амжилт

• Мөнхбаярын Уранбаяр (Outside Hitter / Булангийн довтлогч): Үндэсний дээд лигийн үнэ цэнтэй тоглогч (MVP) тэрээр торны зүүн жигүүрээс хүчтэй кросс болон шулуун довтолгоонуудаараа өрсөлдөгчийн блокыг сэтлэн, шийдвэрлэх тоглолтын "Player of the Match" (Тоглолтын шилдэг тоглогч)-оор шалгарчээ.

• Жаргалцогтын Энх-Эрдэнэ (Opposite Hitter / Диагоналийн довтлогч): Багийн гол оноо түүгч байж, арын бүсийн довтолгоо болон хажуугийн хүчтэй цохилтуудаараа мөн адил "Player of the Match" шагнал хүртэв.

• Ганхуягийн Төрмандах (Setter / Холбогч): Багийн "тархи" болж, өрсөлдөгчийн хамгаалалтыг төөрөгдүүлсэн уран нарийн дамжуулалтуудаар тоглолтыг гардан удирджээ.

   Балбын волейболын холбоо болон хөгжөөн дэмжигчид Монгол тамирчдын ур чадвар, тактикийн өндөр бэлтгэлийг өндрөөр үнэлж, лигийн цар хүрээг шинэ шатанд гаргасныг онцолж байна. Эх орныхоо нэрийг хилийн чанадад дуурсгаж, түүхэн амжилт байгуулсан тамирчиддаа халуун баяр хүргэе.