БНМАУ-ын Баатар Бэгзийн Гивааны мэндэлсний 100 жил, Хилийн цэргийн 0245 дугаар анги үүсэн байгуулагдсаны түүхт 50 жилийн ой тохиож байна. Энэхүү ойн хүрээнд Хууль зүй, дотоод хэргийн сайд С.Амарсайхан, Увс аймгийн удирдлагууд, ахмад хилчид болон хүндэт зочид Төр, нийгмийн нэрт зүтгэлтэн, БНМАУ-ын Маршал Юмжаагийн Цэдэнбал агсны хөшөөнд цэцэг өргөж, хүндэтгэл үзүүлжээ.

   Маршал Ю.Цэдэнбал нь улс орныхоо нам, төрийг олон жил удирдан ажиллаж, Монгол Улсын тусгаар тогтнол, бүрэн эрхт байдлыг бэхжүүлэх, нийгэм, эдийн засгийн хөгжил дэвшилд үнэтэй хувь нэмэр оруулсан түүхэн гавьяатай хүн юм.

   Тус хүндэтгэлийн арга хэмжээ нь түүхэн огноог дурсахын зэрэгцээ эх орныхоо дархан хилийн төлөө амь бие, хөдөлмөр зүтгэлээ зориулсан үе үеийн хилчдийн гавьяаг мөнхөд алдаршуулах ач холбогдолтой юм хэмээн зохион байгуулагчид онцолсон байна.