Онцгой байдлын ерөнхий газар (ОБЕГ), НҮБ-ын Суурин зохицуулагчийн газар болон НҮБ-ын Хүмүүнлэгийн асуудлыг зохицуулах албаны Ази, Номхон далайн бүсийн газар (OCHA ROAP) хамтран “Олон улсын хүмүүнлэгийн ажиллагааны зохицуулалт” сургагч багш бэлтгэх сургалтыг амжилттай зохион байгууллаа. Энэ сарын 09-11-ний өдрүүдэд үргэлжилсэн уг сургалтад ОБЕГ-ын алба хаагчид болон Засгийн газрын Хэрэг эрхлэх газар, яам, агентлагуудын гамшгийн асуудал хариуцсан мэргэжилтнүүд хамрагджээ.

   Сургалтын үеэр оролцогчид олон улсын хүмүүнлэгийн тогтолцоо, гамшгийн үеийн хариу арга хэмжээний зохицуулалт, тусламжийн механизм, нөхцөл байдлыг үнэлэх болон олон улсын багуудын харилцан ажиллагааны чиглэлээр онол, практикийг хослуулан судлав. Ингэснээр үндэсний болон олон улсын түвшний хүмүүнлэгийн хариу арга хэмжээний уялдааг сайжруулах мэдлэг, ойлголттой болсон байна.

   Энэ удаагийн сургалтыг НҮБ-ын Хүмүүнлэгийн асуудлыг зохицуулах албаны Ази, Номхон далайн бүсийн төвийн хүмүүнлэгийн асуудал хариуцсан ажилтан Ван Рүй, тус бүсийн Иргэн-цэргийн зохицуулалт (CMCoord)-ын мэргэжилтэн Нидхират Срисирирожанакорн нар удирдан чиглүүлжээ.

   Мөн үеэр НҮБ-ын Хүнс, хөдөө аж ахуйн байгууллага (FAO), НҮБ-ын Хүн амын сан (UNFPA), НҮБ-ын Олон улсын шилжилт хөдөлгөөний байгууллага (IOM), НҮБ-ын Хүүхдийн сан (UNICEF), Дэлхийн эрүүл мэндийн байгууллага (WHO) болон Монголын Улаан Загалмайн Нийгэмлэг (МУЗН)-ийн төлөөллүүд зочин илтгэгчээр оролцож, салбар хоорондын хамтын ажиллагаа, хүмүүнлэгийн хариу арга хэмжээний туршлагаасаа хуваалцсан байна.

   Энэхүү сургагч багш бэлтгэх сургалт нь гамшгийн үеийн хүмүүнлэгийн тусламж, зохицуулалтын талаарх оролцогчдын чадавхыг дээшлүүлж, үндэсний болон олон улсын байгууллагуудын харилцан ажиллагааг бэхжүүлэх, цаашид энэ чиглэлээр сургалт, дадлага зохион байгуулах боловсон хүчнийг бэлтгэснээрээ өндөр ач холбогдолтой болсон аж.