• Өнөөдөр 2026-10-12

БАЙР СУУРЬ: ШАТАХУУНЫ ҮНЭ НЭМЭГДСЭН Ч ТҮГЭЭЛТ МУУ БАЙНА

2026-08-17,   451

   ОХУ-ын газрын тосны үйлдвэр дроны дайралтад өртснөөс болж, тус улсад шатахууны хомсдол үүссэн. Үүнээс шалтгаалж манайд сар орчим шатахууны хомсдол үүсэж, шатахуун түгээх станцуудад урт дараалал үүсээд байна. Мөн Засгийн газар, АҮЭБЯ-наас хариу арга хэмжээ авч, хэрэгжүүлж байгаа ч шатахуун түгээх станцууд хэвийн олгохгүй байна гэх асуудал үүсээд буй. Өнгөрсөн амралтын өдрүүдэд АИ92 авто бензиний үнэ 200 төгрөгөөр нэмэгдсэн ч олдоц муу байна. Энэ талаар бид шатахуун түгээх станцад дараалж буй иргэдийн байр суурийг сонслоо.

    Иргэн О.Цэдэндамба: Хөдөө явж байгаад өнөөдөр Улаанбаатар хотод ирээд бензин авахаар хүлээж байна. Машинаа асаах бензингүй болсон. Бензиний үнэ нэмэгдээд хэдэн төгрөг ч хүрч байгаа юм мэдэхгүй. Олдож л байвал хэд ч гэсэн хамаагүй авна гэж бодоод л зогсож байна. Өнөөдөр шатахуун түгээх станц дээр ирээд бензин авчихна гэсэн урдуур тасалчихлаа. Ингээд шатахуун түгээхийн гаднаас хөдөлж чадахгүй энд ирээд зогсчихлоо.
 
   Иргэн Б.Должинсүрэн: Хөдөө буцах гээд л бензин хайгаад л явж байна. Олдоц маш ховорхон байна. Ер нь маш чанга байна. Өглөө хоёр, гурван шатахуун түгээх станц дээр орсон авч чадаагүй. Хягаарлалтгүй, хангалттай олгоно гэсэн ч гүүрний цаанаас бүтэн тойроод ирэхэд бензин дуусчихсан гээд яг эндээ нам зогсчихлоо.Бензиний үнээ нэмчихээд, хэвийн олгож болдоггүй юм байхдаа. Хөдөө орон нутаг гэсэн яг л ийм байна гэсэн. Малчид малдаа явах бензин байхгүй. Малдаа явж чадахгүй маш хэцүү байна. Хоёр хүүхдийнхээ хичээлийн хэрэгслийг бэлдчихээд шатахуунаа авчихвал нөгөөдөр явах санаатай байна даа.
 
   Иргэн Г.Энхжин: Өглөө 10:00 цагт ирсэн дөрвөн цаг дараалалд зогсож байна. Өгч байгаа шатахуун түгээх станц маш ховор олдоц муу, хэцүү л байна. Өглөө, өдөр, орой ямар ч ялгаа алга. Үнэхээр зовж, хонон өнжин байж л шатахуун авч байна. Үнэ нь 200 төгрөгөөр нэмэгдсэн саяхан 2500 төгрөг байж байгаад огцом 200 төгрөгөөр нэмэгдээд дахиад тасалдаж ирэхдээ 3000 төгрөг болчихсон байсан.
 
 
Иргэн Г.Мөнхдөл: Алс хол Баян-Өлгий аймгаас ирсэн хоёр хоног шатахуун түгээхийн гадаа зогсож байна. Өнөөдөр буцах гэсэн ч ямар ч боломжгүй болчихлоо. Нэг машинд 50 мянган төгрөгөнд өгч байна гэсэн. Уг нь Засгийн газраас хязгаарлалтгүй олгоно гэсэн ч бодит байдал дээрээ хэрэгжихгүй байна.Энэ шатахуун түгээх станцад 05:00 цагаас хойш долоо, найман цаг оочирлож байна. Одоо дуусчихсан гэж байна. Яаж буцахаа үнэндээ мэдэхгүй л байна. Олдоц байхгүй өчигдөр оройноос хойш ойр хавийн бүх шатахуун түгээх станцаар орсон ч бензин тасарцан байгаа гээд өгөхгүй л байна. Үнэ нэмэгдсэн байна. Баян-Өлгийд ч бас нэмэгдсэн. Түлшний үнэ ч нэмэгдээд 5000 төгрөг болсон. Бензин түлшний үнэ нэмэгдээд хэцүү байна. Баян-Өлгий аймгийн хэмжээнд дараалал ихтэй ч гэсэн таслахгүй өгч байна гэсэн. Нааш ирэх замд бол өгөхгүй байсан. Нутгаасаа саванд хийсэн шатахуунаараа хотод орж ирсэн. Одоо буцах гэсэн бензин байхгүй хүлээгээд л хоёр хоног болж байна. Би машиндаа оочирлож ар гэрийхэн, буцах ар гэрийн ажлыг зохицуулж байна даа. Яаж буцна гэж сэтгэл санаагаар унасан хүмүүс байна.
 
   Иргэн Ц.Доржсүрэн: Өглөөнөөс хойш хэдэн цаг л хүлээгээд шатахуун нь дуусчихсан гээд өгөхгүй байна. Өөр колонкоор оочирлосон бас л дуусцан гээд өгөхгүй л байна. Бензинд амарч байгаа өдрөө л дугаарлаж, ажлаа зохицуулж байна. Ажилтай үедээ бензин авах гээд зогсож байна гэж байхгүй. Үнийн хувьд 200 төгрөгөөр нэмсэн гэж байна.
Ц.Уранцэцэг

БАЙР СУУРЬ: ШАТАХУУНЫ ҮНЭ НЭМЭГДСЭН Ч ТҮГЭЭЛТ МУУ БАЙНА
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.