Монгол Улсын Ерөнхий сайдын захирамжаар байгуулсан шатахууны хангамж, нийлүүлэлтийг тогтворжуулах шуурхай штабын өнөөдрийн /2026.08.06/ хуралдаанаар шатахууны нийлүүлэлтийн нөхцөл байдлыг хэлэлцэж, холбогдох байгууллагуудад үүрэг, чиглэл өглөө.

   Хуралдаанаар 2026 оны наймдугаар сарын 5-нд АИ-92 автобензин авсан иргэдийн 14 хувь буюу 7000 гаруй хүн тухайн өдөртөө дахин шатахуун авахаар оочирлосон талаар мэдээлэв. Харин автомашины улсын дугаарын тэгш, сондгой зохицуулалт хэрэгжиж эхэлснээс хойш АИ-92 автобензиний дараалал сүүлийн хоёр хоногт хоёр дахин буурсан байна.

   Одоогоор дизель түлшийг хэвийн олгож байгаа бол АИ-92 автобензинийг хяналттайгаар борлуулж байна. Шуурхай штабын шийдвэрийн дагуу 100 шатахуун түгээх станц 50 мянган төгрөгийн дээд хязгаартайгаар шатахуун олгож байгаа ч долоон шатахуун түгээх станц энэхүү зохицуулалтыг зөрчиж, хязгаарлалтгүйгээр борлуулалт хийснийг Ашигт малтмал, газрын тосны газраас мэдээлжээ. Иймд дээрх станцуудад торгууль ногдуулах, шаардлагатай тохиолдолд тусгай зөвшөөрлийг нь цуцлах хүртэл арга хэмжээ авахыг анхааруулсан байна.

   Мөн шатахуун импортлогч аж ахуйн нэгжүүдэд төрийн байгууллагуудтай хамтран ажиллаж, шатахуун түгээх станцуудын дотоод зохион байгуулалтыг сайжруулан бүх түгээгүүрээр үйлчилгээ үзүүлж, автомашины дарааллыг бууруулахыг үүрэг болгожээ. Түүнчлэн шатахуун дамлан худалдаалах зөрчилд хяналт тавьж, илэрсэн тохиолдолд цагдаагийн байгууллагатай хамтран хуулийн дагуу арга хэмжээ авах чиглэлийг Монополын эсрэг газарт өгсөн байна.

   Сүүлийн хоёр хоногт 106 вагон буюу 6360 тонн АИ-92 автобензин импортоор орж ирээд байгаа бөгөөд ОХУ-ын Ангарскийн үйлдвэрээс нэмэлтээр 33 вагон буюу 1980 тонн шатахуун нийлүүлэхээр төлөвлөжээ.

   Мөн газрын тосны бүтээгдэхүүний эх үүсвэрийг нэмэгдүүлэх чиглэлд Гадаад харилцааны яаманд эрчимтэй ажиллах үүрэг өгч, бүх төрлийн шатахууны импортыг шуурхай тээвэрлэхэд Гадаад харилцааны яам, Зам, тээврийн яам, Батлан хамгаалах яам хамтран ажиллах, БНСУ болон БНХАУ-аас нийлүүлэх шатахууны тээвэрлэлтийг Батлан хамгаалах яамны дэмжлэгтэйгээр зохион байгуулахаар шийдвэрлэлээ.