Улаанбаатар хот болон бусад суурин газрын хүн ам, үйлдвэрлэл, хөдөө аж ахуйн өсөн нэмэгдэж буй усны хэрэгцээг урт хугацаанд найдвартай хангах зорилгоор "Туул усан цогцолбор" төслийг 2025-2032 онд хэрэгжүүлэхээр төлөвлөжээ.

   Төслийн техник, эдийн засгийн үндэслэлийг Бүгд Найрамдах Энэтхэг Улсын KPIL (Kalpataru Projects International Limited) компани боловсруулж байгаа бөгөөд эхний шатны ТЭЗҮ боловсруулах ажлын гүйцэтгэл 90 хувьд хүрсэн байна. Одоогоор судалгаа, тооцоолол, инженерийн шийдлүүдийг нарийвчлан боловсруулж, газар доорх болон гадаргын усны нөөцийг иж бүрэн судлан, ус ашиглалтын боломжийг баталгаажуулах, нийслэлийн ус хангамжийн тогтвортой эх үүсвэрийг бүрдүүлэх инженерийн шийдлийг тодорхойлж байгаа аж.

   Төслийн хүрээнд 50-100 сая шоо метр ус хуримтлуулах хүчин чадалтай усан сан байгуулахаар төлөвлөсөн бөгөөд далан нь 685.15 метр урт, 35.8 метр өндөр, усан сангийн гүн нь 19.84 метр байх юм. Харин ус хурах нийт талбайг 5,569 км² байхаар тооцоолжээ.

   "Туул усан цогцолбор" төсөл хэрэгжсэнээр Улаанбаатар хотын ус хангамжийн баталгаат эх үүсвэрийг бий болгохоос гадна Туул голын экологийн урсацыг хадгалах, голын урсац тасалдахаас сэргийлэх, үерийн эрсдэлийг бууруулах, мөн томоохон усан сан бүрдсэнээр орчны бичил уур амьсгал, экологид эерэг нөлөө үзүүлэх ач холбогдолтой юм.